نازارباەۆ: ءبارىن ۇكىمەت بەرەدى دەيتىن زامان وتكەن

"كومەككە مۇقتاج انالار مەن بالالارعا كەلەسى ايدان [جاردەماقى] بەرەسىڭدەر دەپ كەشە تاپسىرما بەردىم. كومەك پەن قامقورلىق ءاردايىم ەسەلەنىپ، ارتا بەرەدى. بىراق قازىرگى نارىق زامانىندا قول جايىپ، ۇكىمەتتەن كومەك سۇراۋعا بەيىمدەلمەۋىمىز كەرەك" دەگەن نازارباەۆ.

ول ء"بارىن ۇكىمەت بەرەدى" دەپ سوۆەت كەزىندەگىدەي وتىرا بەرۋگە بولمايتىنىن ايتقان.

"سول كەزدە بالا تۋعاننان كەيىن تەگىن بالاباقشاعا الادى، سودان كەيىن مەكتەپكە، وقۋدى بىتىرگەن سوڭ جۇمىس بەرەدى. قازىر ونداي زامان جوق. ول كەزدە مەملەكەت ەلدىڭ تاپقانىن جيناپ الىپ، بارىنە ءبولىپ وتىراتىن. قازىر اركىم ءوز تابىسىن ءوزى پايدالاناتىن كەزدە نەشە بالا بولاتىنىن، ونى قالاي اسىراۋ كەرەك ەكەنىن، وقۋى بار - سونىڭ ءبارىن ويلانۋ كەرەك" دەگەن پرەزيدەنت.

اقورداداعى كەزدەسۋدە نازارباەۆ اۋىل حالقىنىڭ جاعدايىن جاقسارتۋدى كوزدەيتىن "اۋىل - ەل بەسىگى" ءتارىزدى جوبالار بولعانىنا قاراماستان اۋىلدان قالاعا كوشىپ كەلىپ، ۋاقىتشا باسپانادا تۇرىپ جاتقاندار تۋرالى دا ايتقان.

"قالاعا كەلىپ جاتىر، باسپانا جوق، جۇمىس جوق. قالا ىرگەسىندە ساندالىپ جۇرەدى، ونداي جەردە نەشە ءتۇرلى بولادى. ساياجايدى، سارايدى جالداپ تۇرادى. ارينە، ونى جىلىتقىسى كەلەدى. بىراق بىزدەگىدەي ايازدا جىرىعى كوپ سارايدى قالاي جىلىتاسىڭ؟" دەگەن پرەزيدەنتتىڭ ءسوزىن كەلتىرگەن Tengrinews.​

نازارباەۆ ايەلدەرمەن كەزدەسۋدە قازاقستاندا اجىراسۋ جيىلەپ كەتكەنىنە قىنجىلاتىنىن ايتقان. ونىڭ سوزىنشە، ەلدە نەكەگە تۇرعانداردىڭ 20 پايىزى كەيىن اجىراسىپ كەتەدى.

4 اقپانعا قاراعان ءتۇنى استانانىڭ كوكتال-1 شاعىن اۋدانىندا جەكە ءۇيدىڭ اۋلاسىنداعى ۋاقىتشا باسپانا ورتەنىپ، ءبىر وتباسىنداعى 2006, 2008, 2013, 2015 جانە 2018 جىلى تۋعان بەس قىز بالا وپات بولعان ەدى.​ وسى وقيعادان كەيىن ەلدە انالار نارازىلىعى كۇشەيىپ، قازاقستاندا كوپ بالالى وتباسىلارعا مەملەكەت قامقورلىعىن كۇشەيتۋ تۋرالى تالاپتار ايتىلا باستادى.

27 اقپاندا ءوزى باسقاراتىن بيلىك پارتياسىنىڭ سەزىندە نازارباەۆ الداعى ءۇش جىلدا ەلدە الەۋمەتتىك جاعدايى تومەن وتباسىلاردى قولداۋعا قوسىمشا 300 ميلليارد تەڭگەدەن استام اقشا بولىنەتىنى تۋرالى مالىمدەگەن.

"ازاتتىق" راديوسى