Qazaqstan prezıdenti Nursultan Nazarbaev Halyqaralyq áıelder merekesi (8 naýryz) qarsańynda bir top qazaqstandyq áıeldermen kezdesti. 7 naýryzda Aqordadaǵy kezdesýde prezıdent kóp balaly otbasylarǵa kómek kórsetý týraly aıtty, dep habarlaıdy Qazaqparat.
"Kómekke muqtaj analar men balalarǵa kelesi aıdan [járdemaqy] beresińder dep keshe tapsyrma berdim. Kómek pen qamqorlyq árdaıym eselenip, arta beredi. Biraq qazirgi naryq zamanynda qol jaıyp, úkimetten kómek suraýǵa beıimdelmeýimiz kerek" degen Nazarbaev.
Ol "bárin úkimet beredi" dep sovet kezindegideı otyra berýge bolmaıtynyn aıtqan.
"Sol kezde bala týǵannan keıin tegin balabaqshaǵa alady, sodan keıin mektepke, oqýdy bitirgen soń jumys beredi. Qazir ondaı zaman joq. Ol kezde memleket eldiń tapqanyn jınap alyp, bárine bólip otyratyn. Qazir árkim óz tabysyn ózi paıdalanatyn kezde neshe bala bolatynyn, ony qalaı asyraý kerek ekenin, oqýy bar - sonyń bárin oılaný kerek" degen prezıdent.
Aqordadaǵy kezdesýde Nazarbaev aýyl halqynyń jaǵdaıyn jaqsartýdy kózdeıtin "Aýyl - el besigi" tárizdi jobalar bolǵanyna qaramastan aýyldan qalaǵa kóship kelip, ýaqytsha baspanada turyp jatqandar týraly da aıtqan.
"Qalaǵa kelip jatyr, baspana joq, jumys joq. Qala irgesinde sandalyp júredi, ondaı jerde neshe túrli bolady. Saıajaıdy, saraıdy jaldap turady. Árıne, ony jylytqysy keledi. Biraq bizdegideı aıazda jyryǵy kóp saraıdy qalaı jylytasyń?" degen prezıdenttiń sózin keltirgen Tengrinews.
Nazarbaev áıeldermen kezdesýde Qazaqstanda ajyrasý jıilep ketkenine qynjylatynyn aıtqan. Onyń sózinshe, elde nekege turǵandardyń 20 paıyzy keıin ajyrasyp ketedi.
4 aqpanǵa qaraǵan túni Astananyń Kóktal-1 shaǵyn aýdanynda jeke úıdiń aýlasyndaǵy ýaqytsha baspana órtenip, bir otbasyndaǵy 2006, 2008, 2013, 2015 jáne 2018 jyly týǵan bes qyz bala opat bolǵan edi. Osy oqıǵadan keıin elde analar narazylyǵy kúsheıip, Qazaqstanda kóp balaly otbasylarǵa memleket qamqorlyǵyn kúsheıtý týraly talaptar aıtyla bastady.
27 aqpanda ózi basqaratyn bılik partııasynyń sezinde Nazarbaev aldaǵy úsh jylda elde áleýmettik jaǵdaıy tómen otbasylardy qoldaýǵa qosymsha 300 mıllıard teńgeden astam aqsha bólinetini týraly málimdegen.
"Azattyq" radıosy
