پرەمەر-مينيستر ءاليحان سمايىلوۆ ورتا بيزنەس وكىلدەرىمەن كەزدەستى، دەپ حابارلايدى «ادىرنا» ءتىلشىسى.
جيىنعا استانا، الماتى جانە شىمكەنت قالالارىنىڭ كاسىپكەرلەرى، «اتامەكەن» ۇكپ، سونداي-اق مينيسترلەر، قالا اكىمدەرىنىڭ ورىنباسارلارى مەن كاسىپكەرلىك باستامالاردى دامىتۋعا جانە مەملەكەتتىك قولداۋعا جاۋاپتى كۆازيمەملەكەتتىك سەكتور باسشىلارى قاتىستى.
ناۋرىزدا VIII سايلانعان پارلامەنتتىڭ ءبىرىنشى سەسسياسىنىڭ اشىلۋىندا مەملەكەت باسشىسى ەلىمىزگە ەكونوميكانى دامىتۋ جولىندا وزدەرىنە جاۋاپكەرشىلىك الا الاتىن كاسىپكەرلەردىڭ «جاڭا تولقىنى» قاجەت ەكەنىن اتاپ ءوتتى.
«ورتا بيزنەستەن زور ءۇمىت كۇتىپ وتىرمىز. ول باسەكەگە قابىلەتتى ءونىم شىعاراتىن جانە كەڭ اۋقىمدى قىزمەت كورسەتەتىن وڭدەۋشى سەكتوردىڭ قوزعاۋشى كۇشىنە ءارى درايۆەرىنە اينالۋى ءتيىس»، — دەپ اتاپ ءوتتى ءاليحان سمايىلوۆ.
كەزدەسۋ بارىسىندا قاتىسۋشىلار قارجىلاندىرۋدىڭ قولجەتىمدىلىگىن قامتاماسىز ەتۋ، ءونىم كولەمىن ۇلعايتۋ، يمپورتتى الماستىرۋ جانە جاڭا ءوندىرىس ورىندارىن دامىتۋ، مەملەكەتتىك قولداۋ باعدارلامالارىن جۇزەگە اسىرۋ، مەملەكەتتىك ساتىپ الۋ، سالىق سالۋ، سەرتيفيكاتتاۋ، يندۋستريالىق ايماقتار مەن يندۋستريالىق پاركتەردى دامىتۋ، يننوۆاتسيالاردى ەنگىزۋ، ەكسپورت، جۇمىس ورىندارىن قۇرۋ، كادر دايارلاۋ جانە تاعى باسقا ماسەلەلەردى تالقىلادى.
ۇكىمەت باسشىسى الەمدىك تاجىريبە كورسەتىپ وتىرعانداي، ورتا بيزنەس ۇنەمى وزگەرىپ وتىراتىن نارىقتىق جاعدايلارعا تەز بەيىمدەلەتىنىن اتاپ ءوتتى. بۇل ونى ءوز كەزەگىندە ەكونوميكالىق دامۋدىڭ اسا ماڭىزدى باعدارىنا اينالدىرادى. سول سەبەپتى دامىعان ەلدەر شاعىن كاسىپورىنداردى الەمدىك نارىقتاعى پوزيتسياسىن كەڭەيتىپ، نىعايتۋعا بەلسەندى تۇردە ىنتالاندىرىپ وتىرادى.
«مىسالدى الىستان ىزدەۋدىڭ قاجەتى جوق. Samsung, Toyota نەمەسە Hyundai سياقتى كومپانيالار شاعىن جانە ورتا بيزنەس رەتىندە ءوز جولىن باستاعان، ال بۇگىن ولاردى تابىستى الەمدىك كوشباسشىلار رەتىندە بىلەمىز. ءوز كەزەگىندە ۇكىمەت بيزنەستىڭ دامۋىنا قاجەتتى بارلىق شارالاردى قابىلداپ جاتقانىنا سەندىرگىم كەلەدى»، — دەدى ول.
ءاليحان سمايىلوۆ جۇكتەمەنى ازايتىپ، سالىقتىق اكىمشىلەندىرۋ راسىمدەرىن جەڭىلدەتۋدى كوزدەيتىن جاڭا سالىق كودەكسى ازىرلەنىپ جاتقانىن ايتتى.
