"شامامەن ساعات 19:00 كەزىندە وزبەك پروكۋراتۋراسىنىڭ قىزمەتكەرلەرى تاشكەنتتەگى پاتەرىمە باسا-كوكتەپ كىرىپ كەلدى. مەرزىمىنەن بۇرىن شارتتى تۇردە بوستاندىققا شىققان انام وسى پاتەردە 2018 جىلدىڭ ماۋسىم ايىنىڭ سوڭىنان بەرى تۇرادى. ولاردىڭ [پروكۋراتۋرا وكىلدەرى – رەد.] ءبىرى اۋەلى "باسشىلىق" اتىنان اناما قوقان-لوقى جاساپ، بىرنەشە مينۋتتان سوڭ پروكۋراتۋرانىڭ وزگە قىزمەتكەرلەرىمەن بىرگە جەتىپ كەلىپ، انامدى بەلگىسىز جاققا الىپ كەتتى" دەپ جازدى يمان.
وزبەكستان بيلىگى 46 جاستاعى گۇلنارا كاريموۆانىڭ ۇستالعانىن راستادى. باس پروكۋراتۋرا حابارلاماسىندا 5 ناۋرىزدا ياشناباد اۋداندىق قىلمىستىق ىستەر جونىندەگى سوت "جازا وتەۋ شارتى مەن ءتارتىبىن قاساقانا بۇزعان" كاريموۆانىڭ ەركىندىگىن شەكتەۋ جازاسىن وزگەرتىپ، ونى جالپى رەجيمدەگى تۇزەۋ كولونياسىنا قاماۋعا ۇكىم ەتكەنى ايتىلعان. پروكۋراتۋرانىڭ تۇسىندىرۋىنشە، گۇلنارا كاريموۆا "بايلانىس قۇرالدارىن، ينتەرنەتتى پايدالانعان" جانە ء"وزى كەلتىرگەن زياندى وتەۋگە بەلسەندى تۇردە بوگەت جاساعاندىقتان" سوت بۇعان دەيىن تاعايىندالعان جازا وتەۋ ءتۇرىن وزگەرتكەن.
2015 جىلى وزبەكستان سوتى گۇلنارا كاريموۆانى "بوپسالاۋ، اقشا جىمقىرۋ جانە سالىق تولەۋدەن جالتارۋ" قىلمىستارى بويىنشا ايىپتى دەپ تانىپ، بەس جىلعا باس بوستاندىعىن شەكتەۋ جازاسىن تاعايىنداعان.
شۆەتسيا، شۆەيتساريا مەن اقش كاريموۆانىڭ ۇستىنەن ءىس قوزعاپ، ميلليارد دوللارعا جۋىق قارجى جىمقىرعان دەگەن ايىپ تاققان. ول وزبەكستاندا جۇمىس ىستەگەن تەلەكوممۋنيكاتسيالىق كومپانيالاردىڭ كەمىندە التاۋىنان پارا العان دەگەن كۇدىككە ىلىنگەن.
ءبىر كەزدەرى گۇلنارا كاريموۆا وزبەكستاندى 27 جىل باسقارىپ، 2016 جىلى قىركۇيەكتە قايتىس بولعان اكەسى يسلام كاريموۆتىڭ ورنىن باسۋى ىقتيمال تۇلعا دەپ سانالعان.
"ازاتتىق راديوسى"
