قىرعىز رەسپۋبليكاسىنىڭ پرەزيدەنتى سادىر جاپاروۆ بۇگىن، 7 مامىردا رەسمي ساپارمەن ماسكەۋگە (رەسەي فەدەراتسياسى) ۇشىپ باردى، دەپ جازادى "ادىرنا" پورتالى. بۇل تۋرالى قىرعىز رەسپۋبليكاسى پرەزيدەنتىنىڭ رەسمي سايتىندا ايتىلدى.
ساپار بارىسىندا رەسەي فەدەراتسياسىنىڭ پرەزيدەنتى ۆلاديمير پۋتينمەن ەكىجاقتى كەلىسسوزدەر وتەدى دەپ كۇتىلۋدە.
ەل باسشىلارى ەكىجاقتى جانە كوپجاقتى كۇن تارتىبىندەگى وزەكتى ماسەلەلەردى، سونداي-اق ءوزارا ءتيىمدى ىنتىماقتاستىقتى ودان ءارى دامىتۋ پەرسپەكتيۆالارىن تالقىلايدى.
رەسمي ساپار اياسىندا سادىر جاپاروۆتىڭ باسقا دا رەسمي تۇلعالارمەن كەزدەسۋى جوسپارلانعان.
سونىمەن قاتار، 9 مامىردا مەملەكەت باسشىسى قۇرمەتتى قوناق رەتىندە ماسكەۋدەگى جەڭىس شەرۋىنە بارادى.
قىرعىز رەسپۋبليكاسىنىڭ رەسمي دەلەگاتسياسىنىڭ قۇرامىندا:
ادىلبەك قاسىماليەۆ – مينيسترلەر كابينەتى توراعاسىنىڭ ءبىرىنشى ورىنباسارى;
جەەنبەك قۇلىباەۆ – سىرتقى ىستەر ءمينيسترى;
مۇراتبەك ازىمباكيەۆ – پرەزيدەنت اكىمشىلىگى سىرتقى ساياسات ءبولىمىنىڭ مەڭگەرۋشىسى;
مارات يمانقۇلوۆ – قاۋىپسىزدىك كەڭەسىنىڭ حاتشىسى;
گۇلنار-كلارا سامات – قىرعىز رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى;
ۇلان نيازبەكوۆ – ىشكى ىستەر ءمينيسترى;
اسقاربەك دجانىبەكوۆ – اۋىل شارۋاشىلىعى ءمينيسترى;
تىلەك تەكەباەۆ – كولىك جانە كوممۋنيكاتسيا ءمينيسترى;
دانيار امانگەلديەۆ – ەكونوميكا جانە ساۋدا ءمينيسترى;
قۇدايبەرگەن بازارباەۆ – ەڭبەك، الەۋمەتتىك قامسىزداندىرۋ جانە كوشى-قون ءمينيسترى;
تاالايبەك يبراەۆ – ەنەرگەتيكا ءمينيسترى;
نۇردان ورۋنتاەۆ – بىشكەك قالاسى اكىمىنىڭ ورىنباسارى.
"ادىرنا" ۇلتتىق پورتالى
