ءماجىلىس دەپۋتاتى ەرمۇرات ءباپي 18 جىلعا سوتتالعان ۇقك ەكس-توراعاسى كارىم ءماسىموۆ پەن ونىڭ ءۇش ورىنباسارى تۋرالى ءسوز قوزعادى، دەپ حابارلايدى "ادىرنا" ۇلتتىق پورتالى.
«قاڭتارعا بايلانىستى كارىم ءماسىموۆ پەن ونىڭ ءبىرىنشى ورىنباسارى سامات ءابىش نەگە جاۋاپقا تارتىلمادى؟ وسى سۇراقتىڭ استارىندا بارلىق جاۋاپ تۇر دەپ ويلايمىن. قاڭتاردىڭ بار كىناسىن ءماسىموۆ پەن ونىڭ ءۇش ورىنباسارىنا اۋدارىپ، سامات ءابىشتى قۇتقارىپ قالدى. وپەراتيۆتى قىزمەتتى سول جۇرگىزۋ كەرەك. كارىم ءماسىموۆ ورىسشا ايتقاندا «كوزيول وتپۋششەنيا» – قۇربان بولىپ بارا جاتىر. ارينە، ونىڭ قاڭتارعا قاتىسى بار. ول ءوزىنىڭ تىكەلەي باسشىسى، قاۋىپسىزدىك كەڭەسىنىڭ توراعاسىنىڭ تاپسىرماسىن ورىندادى. ول «ەسكى قازاقستان» ىرقىندا ءجۇردى. ول سوتتالۋعا، جاۋاپ بەرۋگە لايىق تۇلعا. بىراق كىنانىڭ ءبارىن ماسىموۆكە جاۋىپ تاستاپ، قالعان كىنالىلەردى قۇتقارىپ قالۋ – ارنايى جاسالعان امال. قاڭتار – ەشقاشان جابىلىپ قالاتىن ماسەلە ەمەس»، – دەدى دەپۋتات.
سونىمەن قاتار ول نۇرسۇلتان نازارباەۆتىڭ نەمەرە ءىنىسى سامات ءابىشتى نەگە ۇستالماعانىن دا ايتتى.
«وعان ىزدەۋ جاريالانعان جوق. بۇل جەردە شىڭدىقتى جابۋ ەمەس، تۋىسىن قۇتقارىپ قالۋ. بۇل ادىلەتسىزدىك بارىپ تۇرعان. ەگەر ۇقك-ءنىڭ ۇلكەن لاۋازىمدى تۇلعالارى جاۋاپتى بولسا، نەگە سامات ءابىش قالىپ قويادى؟ ول ءبىرىنشى ورىنباسار. ول ۇقك-دەگى وپەراتيۆتى بارلىق قىزمەتكە جاۋاپ بەرەتىن ادام. ۇستالعان ۇشەۋ-تورتەۋىن سوتتاپ جىبەرىپ، نازارباەۆ ءوز ءىنىسىن الىپ قالادى. ادىلەت پە؟ حالىق كورىپ وتىر ونى»، – دەپ تۇيىندەدى ءباپي.
