Májilis depýtaty Ermurat Bápı 18 jylǵa sottalǵan UQK eks-tóraǵasy Kárim Másimov pen onyń úsh orynbasary týraly sóz qozǵady, dep habarlaıdy "Adyrna" ulttyq portaly.
«Qańtarǵa baılanysty Kárim Másimov pen onyń birinshi orynbasary Samat Ábish nege jaýapqa tartylmady? Osy suraqtyń astarynda barlyq jaýap tur dep oılaımyn. Qańtardyń bar kinásin Másimov pen onyń úsh orynbasaryna aýdaryp, Samat Ábishti qutqaryp qaldy. Operatıvti qyzmetti sol júrgizý kerek. Kárim Másimov oryssha aıtqanda «kozıol otpýenııa» – qurban bolyp bara jatyr. Árıne, onyń Qańtarǵa qatysy bar. Ol óziniń tikeleı basshysy, Qaýipsizdik Keńesiniń tóraǵasynyń tapsyrmasyn oryndady. Ol «Eski Qazaqstan» yrqynda júrdi. Ol sottalýǵa, jaýap berýge laıyq tulǵa. Biraq kinániń bárin Másimovke jaýyp tastap, qalǵan kinálilerdi qutqaryp qalý – arnaıy jasalǵan amal. Qańtar – eshqashan jabylyp qalatyn másele emes», – dedi depýtat.
Sonymen qatar ol Nursultan Nazarbaevtyń nemere inisi Samat Ábishti nege ustalmaǵanyn da aıtty.
«Oǵan izdeý jarııalanǵan joq. Bul jerde shyńdyqty jabý emes, týysyn qutqaryp qalý. Bul ádiletsizdik baryp turǵan. Eger UQK-niń úlken laýazymdy tulǵalary jaýapty bolsa, nege Samat Ábish qalyp qoıady? Ol birinshi orynbasar. Ol UQK-degi operatıvti barlyq qyzmetke jaýap beretin adam. Ustalǵan úsheý-tórteýin sottap jiberip, Nazarbaev óz inisin alyp qalady. Ádilet pe? Halyq kórip otyr ony», – dep túıindedi Bápı.
