اقتوبە وبلىسىندا جەتىم بالالاردان نەگىزسىز تابىس تاپقانى ءۇشىن ءبىلىم ءبولىمىنىڭ باسشىسى سوتتالدى. بۇل تۋرالى العا اۋداندىق سوتىنىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
«العا اۋداندىق سوتى قىزمەتتىك وكىلەتتىكتەرىن اسىرا پايدالاندى (361-باپتىڭ 4-بولىگى، 3-تارماعى), قىزمەتتىك وتىرىك اقپارات بەرۋ (369-باپتىڭ 1-بولىگى) جانە كاسىپكەرلىك قىزمەتكە زاڭسىز قاتىسۋ (364-باپ) ايىپتارى بويىنشا ازاماتشا ۋ.-عا قاتىستى قىلمىستىق ءىستى قارادى» دەلىنگەن حابارلامادا.
تەرگەۋ بارىسىندا انىقتالعانداي، اۋداندىق ءبىلىم ءبولىمىنىڭ بۇرىنعى باسشىسى ماتەريالدىق پايدا كورۋ ماقساتىندا وقۋ ورتالىعىن قۇرعان. ودان كەيىن ءبىلىم ءبولىمى مەن جەكە كاسىپكەر اراسىندا بالالارعا قوسىمشا ءبىلىم بەرۋ قىزمەتتەرىن كورسەتۋگە كەلىسىم-شارت جاساپ، 1,2 ميلليون تەڭگە العان.
«جازعى كەزەڭنىڭ سوڭىنا قاراي ءبىلىم ءبولىمى 300 جەتىم بالاعا 12 كۇنتىزبەلىك كۇنگە جازعى دەمالىس لاگەرىنە جولداما الۋعا بولىنگەن 18,8 ملن تەڭگە كولەمىندەگى بيۋدجەت قاراجاتىن يگەرىپ ۇلگەرمەۋى مۇمكىن ەكەنىن ءتۇسىنىپ، اتا-اناسىنىڭ قامقورلىعىنسىز قالعان، از قامتىلعان جانە كوپ بالالى وتباسىلاردان شىققان، مۇگەدەك بالالارعا جاۋاپكەر مەملەكەتتىك ساتىپ الۋ تۋرالى شەشىم قابىلدايدى. ناتيجەسىندە كەيبىر شارتتار وزگەرتىلىپ، لاگەرگە 203 بالا جىبەرىلدى، ونىڭ ىشىندە 160 بالا جوعارىدا اتالعان ساناتقا جاتپايدى، بەلگىلەنگەن 12 كۇننىڭ ورنىنا 7 كۇنتىزبەلىك كۇن بولعان. دەمالىس اياقتالعاننان كەيىن سوتتالۋشى قىزمەتتىك الاياقتىق جاساۋعا كىرىسىپ، رەسمي قارجىلىق قۇجاتتارعا 12 كۇن ىشىندە 300 جولداما قابىلداعانى تۋرالى كورىنەۋ جالعان اقپارات ەنگىزگەن»، – دەدى سوت.
جالپى، جاۋاپكەر جشس شوتىنا 10,3 ملن تەڭگە اۋدارعان.
«پروكۋرور پروتسەسسۋالدىق كەلىسىمدە سوتتالۋشىعا جىل سايىن 100 ساعات ءماجبۇرلى جۇمىسقا تارتۋمەن 3 جىل 6 اي مەرزىمگە باس بوستاندىعىن شەكتەۋ تۇرىندەگى قىلمىستىق قۇقىق بۇزۋشىلىقتاردىڭ جيىنتىعى بويىنشا تۇپكىلىكتى جازا تاعايىنداۋدى سۇرادى. سونداي-اق، مەملەكەتتىك قىزمەتتەگى لاۋازىمداردى اتقارۋعا ءومىر بويىنا تىيىم سالۋ تۇرىندەگى قوسىمشا جازا تاعايىندالسىن»، – دەدى سوت.
سوت اقتوبە وبلىسىنىڭ ءبىلىم باسقارماسىنىڭ باسشىلىعىنا قاتىستى جەكە ۇيعارىم شىعاردى. ايەل كىناسىن مويىنداپ، شىعىندى ءوز ەركىمەن تولەدى.
