1962 جىلى تۋعان وسكەمەن قالاسىنىڭ تۇرعىنى كوزگە بلەفاروپلاستيكالىق وتا جاساتۋ ماقساتىندا سۇلۋلىق سالونىنا بارعان. سۇلۋلىق سالونىنىڭ قىزمەتكەرىندە مەديتسينالىق جانە وزگە دە قىزمەتتى جۇرگىزۋگە ليتسەنزياسى مەن رۇقساتى جوق بولسا دا، پروتسەدۋرانى جاساعان. كەيىن ايەلدىڭ جاعدايى كۇرت ناشارلاپ، اۋرۋحاناعا جەتكىزىلگەن. وكىنىشكە قاراي، كوز جانارىنىڭ اينالاسىن تۇزەتپەك بولعان ايەل وسىلايشا جانساقتاۋ بولىمىندە ەسىن جيناماستان قايتىس بولدى.
وسى وقيعاعا قاتىستى پوليتسيا قىزمەتكەرلەرى تۇسىنىك بەردى. ولار قر قىلمىستىق كودەكسىنىڭ 322-بابى، 3-بولىگىندە كوزدەلگەن قىلمىس بەلگىلەرى بويىنشا سوتقا دەيىنگى تەرگەپ-تەكسەرۋ امالدارىن باستادى.
قالا پروكۋراتۋراسى سۇلۋلىق سالوندارىنا جانە باسقا دا كوسمەتيكالىق پروتسەدۋرالارمەن بايلانىستى قىزمەت كورسەتەتىن ورىندارعا بارعان كەزدە اباي بولۋدى ەسكەرتتى.
"ادىرنا" ۇلتتىق پورتالى
