مەملەكەت باسشىسى ق.ك. توقاەۆتىڭ باستاماسىمەن ەلىمىزدە 2025 جىلعا دەيىن 800 مىڭ بالانىڭ زاماناۋي مەكتەپتە ءبىلىم الۋىنا جاعداي جاساۋ ماقساتىندا «جايلى مەكتەپ» ۇلتتىق جوباسى قولعا الىنعان بولاتىن. وبلىس اكىمى نۇرلىبەك نالىباەۆتىڭ ۇسىنىسى نەگىزىندە الداعى 3 جىلدا قىزىلوردا وبلىسىندا 15100 ورىنعا ارنالعان زاماناۋي 21 مەكتەپ سالىنادى دەپ جوسپارلانۋدا. جوبانىڭ جالپى قۇنى – 100 ملرد. تەڭگە. اتاپ ايتقاندا: قىزىلوردادا - 8, ارالدا - 4, قازالىدا - 2, قارماقشىدا - 2, جالاعاشتا - 1, سىرداريادا - 1, شيەلىدە – 1 جانە جاڭاقورعان اۋدانىندا زاماناۋي 2 مەكتەپ بوي كوتەرەدى.
وبلىستىق ءبىلىم باسقارماسىنىڭ باسشىسى جوبا اياسىندا بيىل وڭىردە 10 مەكتەپتىڭ قۇرىلىسى باستالاتىنىن ايتىپ، ولاردىڭ وزگە مەكتەپتەردەن ايىرماشىلىعىن ءسوز ەتتى.
«مامىر-ماۋسىم ايىندا 10 مەكتەپتىڭ قۇرىلىسىن باستايمىز. بۇگىندە بارلىعىنىڭ جەرى راسىمدەلدى. سمەتالىق قۇجاتتارى دايىندالدى. جالپى ەرەكشەلىگىنە كەلسەك، باستاۋىش جانە جوعارى سىنىپ وقۋشىلارى مەكتەپ عيماراتىنىڭ جەكەلەگەن بلوكتارىندا وقيتىن بولادى. سايكەسىنشە، ولاردىڭ ءوز وقۋ كابينەتتەرى، اجەتحانالارى، سپورتزالدارى بولادى. سونداي-اق بەينەباقىلاۋ، دىبىستىق دابىل سياقتى قاۋىپسىزدىك نىساندارى ورناتىلادى، زاماناۋي فيزيكا، حيميا، بيولوگيا، روبوتوتەحنيكا سياقتى كابينەتتەرمەن قامتاماسىز ەتىلەدى. ارنايى ءبىلىمدى قاجەت ەتەتىن بالالار ءۇشىن قاجەتتى جاعداي جاسالادى»، - دەدى م. شەرماعانبەت.
جالپى، 2023 جىلعا ءبىلىم سالاسىنا 260 ملرد. تەڭگەگە جۋىق قارجى ءبولىنىپ وتىر. الداعى 3 جىلدا وبلىستاعى ءۇش اۋىسىمدى جانە اپاتتى مەكتەپتەردىڭ جاعدايى تولىق شەشىلەدى دەپ كۇتىلۋدە، اۋىلدىق ەلدى مەكەندەردەگى مەكتەپتەر جاڭعىرتۋدان وتەدى.
بىلتىر اپاتتى دەپ تانىلعان 6 مەكتەپتىڭ ۇشەۋىنىڭ ماسەلەسى شەشىمىن تاپتى، ال قالعان 3 مەكتەپ «جايلى مەكتەپ» جوباسى اياسىندا سالىناتىن بولادى. بۇدان بولەك، بيىل 5 مەكتەپتى پايدالانۋعا بەرۋ جوسپارلانۋدا. سونداي-اق اعىمداعى جىلى جوسپارعا سايكەس اۋىلدىق ەلدى مەكەندەگى 47 مەكتەپ جاڭعىرتۋدان وتكىزىلىپ، 51 مەكتەپكە پاندىك (فيزيكا، حيميا، بيولوگيا) كابينەتتەر الىناتىن بولادى.
ءبىلىم سالاسىنداعى تاعى ءبىر قۋانىشتى جاڭالىق، ايماق باسشىسىنىڭ تاپسىرماسىنا سايكەس، بيىل 1-4 سىنىپ وقۋشىلارى مەكتەپتە تەگىن ىستىق تاماقپەن قامتىلۋدا. بۇل وبلىس بويىنشا العاش رەت جۇزەگە اسىرىلىپ وتىر.
