قازاقستاننىڭ جاڭا تاعايىندالعان ەلشىسى اقش پرەزيدەنتىنە سەنىم گراموتاسىن تاپسىردى، دەپ حابارلايدى "ادىرنا" ۇلتتىق پورتالى.
رەسپۋبليكانىڭ اقش-تاعى توتەنشە جانە وكىلەتتى ەلشىسى ماعجان يلياسوۆ امەريكا قۇراما شتاتتارىنىڭ پرەزيدەنتى دونالد ترامپقا سەنىم گراموتاسىن تاپسىردى.
بۇل تۋرالى قازاقستان رەسپۋبليكاسى سىرتقى ىستەر مينيسترلىگىنىڭ ءباسپاسوز قىزمەتى حابارلادى.
ەلشى ماعجان يلياسوۆ بۇل تۋرالى الەۋمەتتىك جەلىدەگى پاراقشاسىندا دا جاريالادى.
"پرەزيدەنت ترامپقا سەنىم گراموتاسىن تاپسىرۋ مەن ءۇشىن ۇلكەن مارتەبە. قازاقستان مەن اقش اراسىنداعى كەڭەيتىلگەن ستراتەگيالىق ارىپتەستىكتى نىعايتۋعا ءوز ۇلەسىمدى قوسۋعا دايىنمىن. ۆاشينگتوندا وتكەن C5+1 ءسامميتىنىڭ ناتيجەلەرىنە، سونداي-اق پرەزيدەنت قاسىم-جومارت توقاەۆ پەن پرەزيدەنت دونالد ترامپتىڭ اق ۇيدەگى ەكىجاقتى كەزدەسۋىندە قول جەتكىزىلگەن ۋاعدالاستىقتارعا سۇيەنە وتىرىپ، بۇل ارىپتەستىكتى جاڭا دەڭگەيگە كوتەرەمىز. قازاقستان مەن اقش اراسىنداعى بىرلەسكەن جۇمىستى اسىعا كۇتەمىن", – دەپ جازدى ماعجان ءىلياسوۆ ح پاراقشاسىندا.
ۆەدومستۆونىڭ مالىمەتىنشە، اق ۇيدە قازاقستان ەلشىسىنىڭ اقش پرەزيدەنتىنە سەنىم گراموتاسىن تاپسىرۋ ءراسىمى سالتاناتتى جاعدايدا ءوتتى.
ماعجان يلياسوۆ اقش-تاعى ەلشى بولىپ، 2025 جىلدىڭ 20 قازانىندا تاعايىندالعان بولاتىن.
