«سامۇرىق-قازىنا» ۇلتتىق ءال-اۋقات قورى جىل سايىن «قازاقستان حالقىنا» قوعامدىق قورىنا تازا تابىسىنىڭ كەمىندە 7%-ىن اۋدارىپ وتىراتىن بولادى. قاراجاتتى ءبولۋ ءتارتىبىن رەتتەيتىن ەرەجەلەر ۇكىمەت قاۋلىسىمەن بەكىتىلدى، دەپ حابارلايدى «ادىرنا» ءتىلشىسى.
قاۋلىعا سايكەس، «قازاقستان حالقىنا» قورى اۋدارىلعان قاراجاتتى بەلگىلەنگەن ماقساتقا باعىتتاۋعا ءتيىس. بۇگىندە قور التى باعىت بويىنشا 25-تەن استام قايىرىمدىلىق باعدارلاماسىن جۇزەگە اسىرادى، ولاردىڭ ىشىندە مەديتسينا، ءبىلىم بەرۋ، سپورت، مادەنيەت، الەۋمەتتىك قولداۋ، سونداي-اق توتەنشە جاعدايلار كەزىندە كومەك كورسەتۋ سالالارى بار.
اتاپ ايتقاندا، ناۋقاستاردى ءدارى-دارمەكپەن، جاستار مەن مۇگەدەكتىگى بار بالالاردى يننوۆاتسيالىق پروتەزدىك-ورتوپەديالىق بۇيىمدارمەن قامتاماسىز ەتۋ، اۋىلدا نەگىزگى مەكتەپتەر، ەرتە ارالاسۋ ورتالىقتارى، اۋتيزممەن اۋىراتىن بالالارعا ارنالعان ورتالىقتاردى قۇرۋ، مەديتسينالىق ۇيىمداردى زاماناۋي قۇرالدارمەن جابدىقتاۋ، اۋىل مەكتەپتەرىنىڭ تۇلەكتەرىنە جانە حالىقتىڭ الەۋمەتتىك وسال توپتارىنا كىرەتىن وقۋشىلارعا ءبىلىم گرانتتارىن ۇسىنۋ باعدارلامالارى بار.
ەسكە سالا كەتەيىك، جىل سايىن «سامۇرىق-قازىنا» قورىنىڭ تازا تابىسىنىڭ كەم دەگەندە 7%-ىن «قازاقستان حالقىنا» قوعامدىق قورىنا اۋدارۋ تۋرالى باستامانى مەملەكەت باسشىسى «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى حالىققا جولداۋىندا ايتقان بولاتىن.
