سەنات وتىرىسىندا دەپۋتات اندرەي لۋكين الماتى قالاسىنىڭ تاۋلى جانە تاۋ بوكتەرىندەگى اۋدانداردا قۇرىلىسقا موراتوري جاريالاپ، شەكتەۋدى ۇسىندى. سونىمەن قاتار، اقشاعا قۇنىعىپ، ەسەپسىز بايۋ جولىندا تۇسكەن توپتاردىڭ اسەم قالا تابيعاتىن ءتۇبى قۇرتىپ تىناتىنىن ايتىپ، دابىل قاقتى، دەپ حابارلايدى "ادىرنا" ۇلتتىق پورتالى.
دەپۋتات الماتى قالاسىنداعى جۇرتشىلىقتىڭ ءۋاجىن جەتكىزىپ، تاۋ بوكتەرىندە قاۋلاعان قۇرىلىستىڭ جۇرتشىلىقتى تولعاندىرىپ وتىرعاندىعىن ايتتى. مۇنىمەن قوسا، قۇرىلىس سالۋ بارىسىندا الما باقتارى وتالىپ، داۋلى ماسەلەلەردىڭ كۇرمەۋى كوبەيە تۇسكەن.
"جەكەمەنشىك قۇرىلىس كومپانيالارى بيزنەستى تەكسەرۋگە قويىلعان ءموراتوريدى العا تارتىپ، شارۋا قوجالىعى مەن باۋ-باقشاعا ارنالعان جەردىڭ ماقساتىن جەكە تۇرعىن ءۇي سالۋعا وزگەرتىپ الادى جانە تاۋ بوكتەرىندەگى ايماقتاردا كوپقاباتتى تۇرعىن ءۇي كەشەندەرى قۇرىلىسىن سالۋدى قارقىندى جالعاستىرىپ كەلەدى. تاۋ بوكتەرىنىڭ جۇمساق جەرى كۇردەلى قۇرىلىسقا جارامسىز ەكەنى بەلگىلى. تجم بۇل ۋچاسكەدەگى قۇرىلىس تەحنوگەندىك سيپاتتاعى كوشكىندەرگە اكەلۋى مۇمكىن ەكەنى بىرنەشە رەت حاباردار ەتكەن بولاتىن", - دەدى دەپۋتات سەناتتىڭ جالپى وتىرىسىندا ۇكىمەت باسشىسىنىڭ اتىنا جولداعان دەپۋتاتتىق ساۋالىندا.
دەپۋتات مۇنداي قارقىندى قۇرىلىستىڭ جايدان-جاي بولىپ وتىرعان جوق ەكەندىگىن دە تىلگە تيەك ەتتى. الما باقتارىنىڭ وتالىپ، ورنىنا قارقىندى تۇرعىن ۇيلەردىڭ سالىنۋى بىرەۋدىڭ مۇددەسىمەن نەمەسە سالعىرتىعىنان بولىپ وتىرعاندىعىن قاداپ ايتتى.
"جىلجىمايتىن مۇلىك سالاسىنداعى حابارلاندىرۋلاردى ورنالاستىرۋعا ارنالعان قازاقستاندىق ءىرى سايتتاردىڭ بىرىندە كامەنسكوە پلاتو شاعىن اۋدانىندا 50 سوتىقتان گەكتارعا دەيىنگى جەر ۋچاسكەلەرىن ساتۋ تۋرالى بىرنەشە حابارلاندىرۋ بار. بۇل ۋچاسكەلەر ءبىر كەزدەرى شارۋا قوجالىقتارى رەتىندە بەرىلگەن بولاتىن، ال قازىر كوتتەدج قالاشىقتارى، تاۋنحاۋستار، كلۋب ۇيلەرى ءۇشىن «ەڭ جاقسى ورىن» رەتىندە ساتىلىپ جاتىر. ءبىر حابارلاندىرۋدا مەنشىك يەسى ءتىپتى مەملەكەتتىك ورگاندارداعى بايلانىستار ارقىلى جەردىڭ نىسانالى ماقساتىن قايتا رەسىمدەۋ جانە وزگەرتۋ كەزىندە كومەك كورسەتۋگە دايىن", - دەدى اندرەي لۋكين.
سونداي-اق، دەپۋتات الما باعى جايناعان الماتى قالاسىنىڭ تابيعاتىنا دا الاڭداۋلى. الماتى اۋداندارىنىڭ ەكولوگيالىق كۇيى مەن تاۋ بوكتەرىنىڭ ەرەكشە سۇلۋ تابيعاتى كەيبىر توپتىڭ پايداعا كەنەلۋ مەن بايۋعا ەسەپسىز قۇنىعۋىنا بايلانىستى جويىلىپ كەتۋى مۇمكىن دەپ دابىل قاقتى. سەناتور شۇعىل ارادا ۇكىمەتكە وسى ماسەلەنى قولعا الىپ، باقىلاۋدا ۇستاۋدى ۇسىندى.
"ادىرنا" ۇلتتىق پورتالى
