Senat otyrysynda depýtat Andreı Lýkın Almaty qalasynyń taýly jáne taý bókterindegi aýdandarda qurylysqa moratorıı jarııalap, shekteýdi usyndy. Sonymen qatar, aqshaǵa qunyǵyp, esepsiz baıý jolynda túsken toptardyń ásem qala tabıǵatyn túbi qurtyp tynatynyn aıtyp, dabyl qaqty, dep habarlaıdy "Adyrna" ulttyq portaly.
Depýtat Almaty qalasyndaǵy jurtshylyqtyń ýájin jetkizip, taý bókterinde qaýlaǵan qurylystyń jurtshylyqty tolǵandyryp otyrǵandyǵyn aıtty. Munymen qosa, qurylys salý barysynda alma baqtary otalyp, daýly máselelerdiń kúrmeýi kóbeıe túsken.
"Jekemenshik qurylys kompanııalary bıznesti tekserýge qoıylǵan moratorııdi alǵa tartyp, sharýa qojalyǵy men baý-baqshaǵa arnalǵan jerdiń maqsatyn jeke turǵyn úı salýǵa ózgertip alady jáne taý bókterindegi aımaqtarda kópqabatty turǵyn úı keshenderi qurylysyn salýdy qarqyndy jalǵastyryp keledi. Taý bókteriniń jumsaq jeri kúrdeli qurylysqa jaramsyz ekeni belgili. TJM bul ýchaskedegi qurylys tehnogendik sıpattaǵy kóshkinderge ákelýi múmkin ekeni birneshe ret habardar etken bolatyn", - dedi depýtat Senattyń jalpy otyrysynda Úkimet basshysynyń atyna joldaǵan depýtattyq saýalynda.
Depýtat mundaı qarqyndy qurylystyń jaıdan-jaı bolyp otyrǵan joq ekendigin de tilge tıek etti. Alma baqtarynyń otalyp, ornyna qarqyndy turǵyn úılerdiń salynýy bireýdiń múddesimen nemese salǵyrtyǵynan bolyp otyrǵandyǵyn qadap aıtty.
"Jyljymaıtyn múlik salasyndaǵy habarlandyrýlardy ornalastyrýǵa arnalǵan qazaqstandyq iri saıttardyń birinde Kamenskoe plato shaǵyn aýdanynda 50 sotyqtan gektarǵa deıingi jer ýchaskelerin satý týraly birneshe habarlandyrý bar. Bul ýchaskeler bir kezderi sharýa qojalyqtary retinde berilgen bolatyn, al qazir kottedj qalashyqtary, taýnhaýstar, klýb úıleri úshin «eń jaqsy oryn» retinde satylyp jatyr. Bir habarlandyrýda menshik ıesi tipti memlekettik organdardaǵy baılanystar arqyly jerdiń nysanaly maqsatyn qaıta resimdeý jáne ózgertý kezinde kómek kórsetýge daıyn", - dedi Andreı Lýkın.
Sondaı-aq, depýtat alma baǵy jaınaǵan Almaty qalasynyń tabıǵatyna da alańdaýly. Almaty aýdandarynyń ekologııalyq kúıi men taý bókteriniń erekshe sulý tabıǵaty keıbir toptyń paıdaǵa kenelý men baıýǵa esepsiz qunyǵýyna baılanysty joıylyp ketýi múmkin dep dabyl qaqty. Senator shuǵyl arada Úkimetke osy máseleni qolǵa alyp, baqylaýda ustaýdy usyndy.
"Adyrna" ulttyq portaly
