بيىلعى جىل باسىنان 4,5 مىڭ استام ەتنيكالىق قازاق قانداس مارتەبەسىن الدى.
بۇل تۋرالى "ادىرنا" ۇلتتىق پورتالى ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ حابارلايدى.
2023 جىلعى 1 ساۋىردەگى جاعداي بويىنشا 4 575 ەتنيكالىق قازاق تاريحي وتانىمەن تابىسىپ، قانداس مارتەبەسىن الدى. جالپى 1991 جىلدان بەرى رەسپۋبليكاعا 1 ميلليون 111,1 مىڭ ەتنيكالىق قازاق ورالدى.
جىل باسىنان قازاقستانعا كەلگەن قانداستاردىڭ تەڭ جارتىسى (52,4%) – وزبەكستاننان، 19,3% – قىتايدان، 6,3% – تۇرىكمەنستاننان، 5,3% – موڭعوليادان، 13% – رەسەيدەن جانە 3,7% باسقا ەلدەردەن كەلدى.
ولار نەگىزىنەن الماتى (27,9%), ماڭعىستاۋ (13,9%), تۇركىستان (6,8%) جانە جامبىل (5%) وبلىستارىنا، سونداي-اق الماتى (9,0%), استانا (11%) جانە شىمكەنت (6,5%) قالالارىنا قونىستاندى.
وسى جىلدىڭ 1 ساۋىرىندەگى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى – 69,1%، ەڭبەككە قابىلەتتى جاستان كىشىلەر – 22,3% جانە زەينەتكەرلەر 8,6% قۇرايدى.
ەڭبەككە قابىلەتتى جاستاعى قانداستاردىڭ ىشىندە ءبىلىم دەڭگەيى بويىنشا 18,5% - جوعارى ءبىلىمدى، 39,9% - ورتا كاسىبي ءبىلىمدى، 36,7% - جالپى ورتا ءبىلىمدى جانە 4,8% ءبىلىمى جوق.
