اقتوبە وبلىسىنىڭ ەكس-اكىمى، «اقتوبە اكك» بۇرىنعى توراعاسى ەرمەك يمانتاەۆتى قاماۋدا ۇستاۋ مەرزىمى ۇزاردى. بۇل تۋرالى اقتوبە وبلىسى بويىنشا سىبايلاس جەمقورلىققا قارسى قىزمەت مالىمدەدى، دەپ حابارلايدى “ادىرنا” ۇلتتىق پورتالى.
ايتا كەتەيىك، ەرمەك يمانتاەۆ مامانداندىرىلعان تەرگەۋ سوتىنىڭ قاۋلىسىمەن بيىل 10 اقپاندا 8 ساۋىرگە دەيىن 2 اي مەرزىمگە قاماۋعا الىنعان بولاتىن. وعان لاۋازىمدىق وكىلەتتىگىن اسىرا پايدالانىپ، جەر ۋچاسكەلەرىن ءوز باعاسىنان تومەن ساتتى دەگەن ايىپ تاعىلعان. سالدارىنان مەملەكەتكە 199,4 ملن تەڭگە زالال كەلتىرىلگەن.
“بۇل باپ بويىنشا مۇلكى تاركىلەنىپ، بەلگىلى ءبىر لاۋازىمداردى اتقارۋعا ءومىر بويىنا تىيىم سالا وتىرىپ، 7 جىلعا دەيىن باس بوستاندىعىنان ايىرۋ نەمەسە شەكتەۋ جازاسى قاراستىرىلعان. سوتقا دەيىنگى تەرگەۋ جالعاسىپ جاتىر”، - دەلىنگەن ۆەدومستۆونىڭ ءباسپاسوز حابارلاماسىندا.
ەرمەك يمانتاەۆ 2002-2004 جىلدارى اقتوبە وبلىسىنىڭ اكىمى بولعان. ودان كەيىن پرەزيدەنت اكىمشىلىگىنىڭ مەملەكەتتىك باقىلاۋ جانە ۇيىمداستىرۋ جۇمىسى ءبولىمىنىڭ، ۇيىمداستىرۋ-باقىلاۋ جۇمىسى جانە كادر ساياساتى باسقارماسى مەملەكەتتىك ينسپەكتسياسىنىڭ مەملەكەتتىك ينسپەكتورى بولىپ قىزمەت اتقاردى.
2010 جىلدان باستاپ استانادا ءتۇرلى قۇرىلىمداردا ەڭبەك ەتتى. 2019 جىلدىڭ قاراشا ايىندا ول اقتوبەگە قايتا ورالىپ، «اقتوبە اكك» باسشىسى بولىپ تاعايىندالدى. وندا 2021 جىلدىڭ ناۋرىزىنا دەيىن قىزمەت اتقارعان.
