اۋە كەڭىستىگىندە ۇشۋ قاۋىپسىزدىگىن قامتاماسىز ەتەتىن «قازاەروناۆيگاتسيا» رمك قىزمەتتەرىنە جۇمسالاتىن شىعىندار اۆيابيلەت قۇنىنىڭ وسۋىنە اسەر ەتەدى. بۇل تۋرالى سىبايلاس جەمقورلىققا قارسى ستراتەگياسىنىڭ ارنايى مونيتورينگ توبىنىڭ مۇشەسى اندرەي اندرەەۆ «گولوس نارودا» Youtube ارناسىنا بەرگەن سۇقباتىندا ايتتى، دەپ حابارلايدى «ادىرنا» ءتىلشىسى orda.kz-كە سىلتەمە جاساپ.
2015 جىلى قازاقستاندىق كومپانيا مەن «قازاەروسەرۆيس» اق اراسىندا مەملەكەتتىك ساتىپ الۋ راسىمدەرى ارقىلى 4 دوپلەرلىك مەتەورولوگيالىق راديولوكاتوردى جەتكىزۋ بويىنشا كەلىسىمشارت جاسالدى. ول جەردە تاۋاردى الۋ جانە ىسكە قوسۋ-باپتاۋ، لوكتاتور ورناتۋعا ارنالعان باعانا سالۋ جۇمىستارىن ەسەپتەگەندە ارقايسىسى 484 ملن تەڭگەگە باعالانعان. الايدا كوپ ۇزاماي كاسىپورىن تاراتىلادى. ءبىر قىزىعى، ونىڭ ورنىنا قۇرىلعان «قازاەروناۆيگاتسيا» رەسپۋبليكالىق مەملەكەتتىك كاسىپورنى بۇل قىزمەتتەردى 4 ەسە قىمبات باعاعا ساتىپ العان.
«باستاپقىدا جابدىق 1,7 ميلليارد تەڭگەدەن ءسال از باعالانعان بولسا، كەيىن باعاسى 4,8 ميلليارد تەڭگەگە جەتتى. ماسەلە ونىڭ ءبىرىنشى جەتكىزۋشىدەن الىنعانىندا بولىپ تۇر. ياعني، باعا ءوسىرىلىپ ساتىلدى. بۇل اۋە بيلەتىنىڭ قۇنىنا تىكەلەي اسەر ەتەدى. اۆياكومپانيا اۋەجايلارعا قاشان ۇشۋعا بولادى سىندى اەروناۆيگاتسيالىق اقپاراتپەن قامتاماسىز ەتكەنى ءۇشىن اقشا تولەيدى. بۇل قارجىنى اقتاۋ ءۇشىن اۋەجاي بەرىلەتىن اقپارات قۇنىن وسىرەدى»،—دەدى اندرەەۆ.
ايتۋىنشا، كەيىننەن «قازاەروسەرۆيس» ءۇشىن ساتىپ الىنعان لوكاتورلاردى 2018 جىلى «VS TRADE» جشس 4 قۇرىلعىنى 423,7 ملن تەڭگەدەن ساتىپ العانى انىقتالدى. وسى 4 دوپلەرلىك مەتەورولوگيالىق راديولوكاتور «قازاەروناۆيگاتسيا» رمك-عا ارقايسىسى 1,2 ملرد تەڭگەدەن ساتىلدى، جالپى سوما 4,8 ملرد تەڭگەنى قۇرادى. ايىرماشىلىق 3,1 ملرد تەڭگە شاماسىندا بولىپ وتىر.
وسى ورايدا «نەگە سول راديولوكاتوردى باسقا كومپانيا ارقىلى شامامەن 4 ەسە قىمبات باعاعا ساتىپ الۋ كەرەك بولدى؟» دەگەن سۇراق تۋىندايتىنى ءسوزسىز. سۇقباتتىڭ تولىق نۇسقاسىن كورۋ ءۇشىن سىلتەمەنى باسىڭىز.
