مەملەكەتتىك قىزمەتكە قابىلداۋ كەزىندە وتكىزىلەتىن تەستىلەۋدە قازاق ءتىلى ەسەپكە الىناتىن نورما ەنگىزۋ قاجەت. بۇل تۋرالى ءماجىلىستىڭ جالپى وتىرىسىندا دەپۋتات سامات مۇساباەۆ ايتتى، دەپ حابارلايدى "ادىرنا" ۇلتتىق پورتالى.
«بۇگىنگى وزەكتى ماسەلە، ول – مەملەكەتتىك قىزمەت سالاسىنداعى قازاق ءتىلىنىڭ جاعدايى. زاڭمەن بەكىتىلگەن بيىك مارتەبەسىنە قاراماستان، بۇگىنگى كۇنگە دەيىن مەملەكەتتىك قىزمەت سالاسىندا انا ءتىلىمىزدىڭ رەسمي ءتىلدىڭ تاساسىندا قالىپ وتىرعانى جاسىرىن ەمەس. قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ 2017 جىلعى 21 اقپانداعى №40 بۇيرىعىنا سايكەس، مەملەكەتتىك اكىمشىلىك لاۋازىمىنا ورنالاسۋعا ارنالعان كونكۋرستى وتكىزۋ قاعيداسىندا «قازاقستان رەسپۋبليكاسىنىڭ مەملەكەتتىك ءتىلىن بىلۋگە ارنالعان تەستىلەۋدەن ءوتۋ ءۇشىن - ءمان بەلگىلەنبەيدى» دەپ جازىلعان. دەمەك بۇل، مەملەكەتتىك قىزمەتكە ءوتۋ بارىسىنداعى تاپسىرىلاتىن تەستىلەۋدە قازاق ءتىلىنىڭ قاجەتتىلىگى جوق ەكەنىن بىلدىرەدى»، - دەدى مەملەكەتتىك قىزمەت ىستەرى اگەنتتىگى توراعاسىنىڭ اتىنا دەپۋتاتتىق ساۋال جولداعان سامات مۇساباەۆ.
مىسالى ونىڭ دەرەگىنشە، «ب» كورپۋسىنىڭ مەملەكەتتىك قىزمەتكە ءوتۋ سىناعىندا 9 نورماتيۆتىك-قۇقىقتىق اكتىلەر بويىنشا قامتىلعان 130 سۇراقتىڭ بەلگىلى ءبىر مەجەسى كورسەتىلگەن.
ال قازاق تىلىنەن ءوتۋ مەجەسى ايقىندالماعان. بۇل انا تىلگە دەگەن قۇرمەتتىڭ مۇلدەم جوقتىعىن كورسەتەدى.
«بىزگە تۇسىنىكسىزدىگى، مەملەكەتتىك قىزمەتكە وتكەن ازاماتتارعا بەرىلەتىن سەرتيفيكاتتا «ۇمىتكەر قازاقستان رەسپۋبليكاسىنىڭ مەملەكەتتىك ءتىلى مەن زاڭنامالارىن بىلۋگە ارنالعان تەستىلەۋدەن ءساتتى ءوتتى» دەپ جازىلادى. بۇل انىق كوز بوياشىلىق ەمەس پە؟ وسىعان وراي ءبىزدىڭ ۇسىنىسىمىز مەملەكەتتىك قىزمەتكە قابىلداۋ كەزىندە وتكىزىلەتىن تەستىلەۋ كەزىندە قازاق ءتىلى ەسەپكە الىنىپ، ۇمىتكەر 100 پايىز مەملەكەتتىك تىلدەن وڭ ناتيجە شىعارۋ كەرەك دەگەن نورمالار ەنگىزىلسىن»، - دەدى ءماجىلىس دەپۋتاتى.
