پەتروپاۆلدەگى “حالىق كەڭەسىن” قۇردىق دەگەن سەپەراتورلار كەشىرىم سۇراپ، ۇيىمنىڭ بەلسەندىلەرى ءوز ارەكەتتەرىن تۇسىندىرۋگە تىرىسىپ، وپپوزيتسيا جەتەكشىسى مۇحتار ءابليازوۆتى جانە ۆيدەونى جاريالاعان “باسە” كانالىن جالا جاپتى دەپ ايىپتادى. بۇل تۋرالى ولار جەلىگە ۆيدەو جاريالادى، دەپ حابارلايدى “ادىرنا” ۇلتتىق پورتالى.
ولاردىڭ ايتۋىنشا، تاراعان ۆيدەودا ولار تاۋەلسىزدىگىن قازاقستاننان ەمەس، وليگارحتاردان الۋ كەرەگىن ايتقان.
"وكىنىشكە قاراي، قازاقستاندا وليگارحتار مەن جەمقورلار تۇرىندەگى كورپوراتيۆتىك قۇرام بار. ءبىز وسى كورپوراتيۆتىك قۇرامداس بولىكتەن تاۋەلسىزدىگىمىزدى، اۆتونوميامىزدى جانە ەگەمەندىگىمىزدى جاريا ەتتىك", - دەيدى ولار.
سونداي-اق، ولار كەيبىر باق، بلوگەرلەر، ۆيدەونى تاراتقان “باسە” كانالىنىڭ جانە مۇحتار ءابىليازوۆتىڭ جالا جاپقانىن ايتىپ، اقتالدى.
«بۇل پروتسەستى ءابليازوۆ جانە باسقا دا كوپتەگەن بلوگەرلەر جۇرگىزدى، ولار حالىقتى اداستىردى. ءبىزدىڭ سوڭعى جىلدارداعى ءىس-ارەكەتىمىز ونىڭ تەك بەيبىت شەشىمدەرمەن ۇشتاسىپ جاتقانىن راستايدى.
بىزگە جانە ءبىزدىڭ جاقىندارىمىزعا قاۋىپ تونۋدە. ايعاقتاردىڭ بارلىق سكرينشوتتارى ۇقك قىزمەتكەرلەرى تاركىلەگەن تەلەفوندارىمىزدا بار. مۇددەلى تاراپتار بۇل جاعدايدى ەلدە الاۋىزدىق تۋدىرۋ ءۇشىن ادەيى پايدالانىپ وتىر»، - دەپ قوستى بەلسەندىلەر.
ەسكە سالايىق، پەتروپاۆلدىق بەلسەندىلەر الەۋمەتتىك جەلىلەردە قازاقستان ساياساتىن سىنايتىن پاراقشالاردى جۇرگىزەدى. ولار قازاقستان بيلىگىنىڭ وكىلدەرىن، زاڭنامالىق اكتىلەردى مويىندامايدى. بەلسەندىلەر ءوز باسىلىمدارىندا قازاقستان رەسپۋبليكاسىن «كورپوراتسيا» دەپ اتايدى.
ۇقك مەن سولتۇستىك قازاقستان پوليتسياسى سەپاراتيزمدى ناسيحاتتاۋ فاكتىسى بويىنشا تەرگەۋ باستادى.
