2019 جىلى بۇكىلالىمدىك ءتاج تاجال كەلىپ، ابىگەرگە سالعان شاعىندا قانداي دا ءبىر قۇجات دايىنداماق بولىپ حالىققا قىزمەت كورسەتۋ ورتالىعىنا جولىم ءتۇستى. ۇزىن-سانار كەزەك كۇتىپ تۇرعان شاقتا كەزەكسىز الدەكىمدەر جانىمىزدان ءوتىپ جاتتى. سويتسەك، ول ازاماتتار تسيفرلاندىرۋدىڭ جاھاندىق جاڭا ءادىسىن پايدالانۋ ارقىلى الدىن-الا تىركەلىپ قويعان. ءدال وسى كەزدە تەحنولوگيا مۇمكىندىكتەرىنىڭ كوز ىلەسپەس شاپشاڭدىقپەن دامىپ جاتقانىنا كوز جەتكىزدىك. ودان بەرى تاعى 2-3 جىل ۋاقىت ءوتتى. حالىققا قىزمەت كورسەتۋ ورىندارىنا بارىپ، ۇزىن-سونار كەزەك كۇتىپ الاتىن انىقتامالاردى ۇيالى بايلانىس نومىرگە ەنگىزىلگەن ءموديلدى قوسىمشالار ارقىلى ساقتاپ الاتىن دارەجەگە جەتتىك.
قايسىبىركۇنى تسيفرلىق تەحنولوگيانىڭ دامىعانى سونشالىق ۇيدەن شىقپاي-اق تالاي تىرلىكتى وڭتايلى شەشۋگە بولاتىنىنا قانىق بولدىق. جىل ەمەس، اي ەمەس، كۇن سايىن العا جىلجىعان تەحنولوگيا جاڭالىقتارىن باقىلىپ وتىرۋ دا بىرازعا جۇك بولادى. وتكەن جىلدىڭ سوڭىندا مەملەكەت باسشىسى قاسىم-جومارت كەمەلۇلى توقاەۆ تۇركى مەملەكەتتەرى ۇيىمى باسشىلارىنىڭ سامميتىندە Astana Hub حالىقارالىق تەحنوپاركىنىڭ بازاسىندا تسيفرلاندىرۋ ورتالىعىن قۇرۋدى ۇسىنعان بولاتىن.
«قازىرگى گەوساياسي جاعدايدا ەلدەر تەحنولوگيا جاعىنان ءبىر-بىرىنەن وقشاۋلانىپ بارادى. سوندىقتان تۇركى ەلدەرىنىڭ IT سالاسىنداعى سوڭعى جاڭالىقتارىنا ءجىتى نازار اۋدارۋ كەرەك. بۇل ءبىزدىڭ تسيفرلىق دامۋىمىزعا جول اشادى»، – دەدى ق.توقاەۆ.
مەملەكەت باسشىسى ايتقانداي، الماعايىپ شاقتىڭ وزىندە تەحنولوگياعا سۇرانىس وراسان. جانە كىمنىڭ تەحنولوگياسى مىقتى سول جىلىكتىڭ ەڭ مايلىسىن يەمدەنەدى. الەمدە ورىن الىپ جاتقان گەوساياسي جاعدايلار IT سالاسىنداعى ماماندار شابىتىن وياتىپ جاتقانداي دەرسىڭ. كۇن سايىن جاڭاشىلدىق تانىتىپ، جاڭا دۇنيەلەر قولدانىسقا ەنىپ جاتىر. بۇل رەتتە مەملەكەت باسشىسى ايتقانداي تۇركى ەلدەرىنىڭ IT سالاسىن ءجىتى قاداعالاۋعا الىپ، جاستاردىڭ وسى باعىتتا تەرەڭدەتىپ ءبىلىم الۋىنا جاعداي جاساۋ كەرەك. اتالعان باسقوسۋدا قاسىم-جومار كەمەلۇلى مەملەكەتتەر اراسىنداعى IT حابتار اراسىندا كەلىسىم بولعانىن تىلگە تيەك ەتكەن-ءدى.
«مەملەكەتتەرىمىزدىڭ IT حابتارى اراسىنداعى ءوزارا ءىس-قيمىل تۋرالى مەموراندۋمعا قول قويىلدى. وسى رەتتە مەن استانا حاب حالىقارالىق تەحنوپاركى نەگىزىندە تۇركى مەملەكەتتەرى ۇيىمىنىڭ تسيفرلاندىرۋ ورتالىعىن قۇرۋدى ۇسىنامىن. بۇل قۇرىلىم ساۋدا، كولىك، سۋ رەسۋرستارى، اقپاراتتىق قاۋىپسىزدىك جانە باسقا دا سالالارعا قاجەتتى تسيفرلىق شەشىمدەر ازىرلەۋگە مۇمكىندىك بەرەدى»، – دەدى ق.توقاەۆ.
اقوردا باسشىسىنىڭ بۇل تاقىرىپقا اۋەلدەن اشىق ەكەنىن جاقسى بىلەمىز. جاڭادان پرەزيدەنت بولىپ سايلانعان جىلداردان باستاپ تسيفرلاندىرۋعا وراسان زور كوڭىل ءبولىپ كەلەدى. «تسيفرلىق قازاقستان» مەملەكەتتىك باعدارلاماسىن جۇزەگە اسىرۋ جونىندە ارانيى كەڭەس تە وتكىزىپ، ناقتىلى تاپسىرمالار دا بەرىلدى. «قازاقستان پرەزيدەنتى ۇكىمەت پەن ۇقك بىرلەسىپ اقپاراتتىق رەسۋرستاردى جانە جالپى «تسيفرلىق دەربەستىكتى» ءتيىمدى قورعاۋدى قامتاماسىز ەتۋ جونىندە تاپسىرما بەردى. ونىڭ ايتۋىنشا، بۇل ماقساتتا اقپاراتتىق قاۋىپسىزدىكتىڭ 10 جەدەل ورتالىعىن قۇرۋ جۇمىسىن جالعاستىرۋ قاجەت. سونداي-اق «اقپاراتتىق قاۋىپسىزدىك» ماماندىعى بويىنشا ءبىلىم بەرۋ گرانتىن كەمى ەكى مىڭعا دەيىن ارتتىرۋ كەرەك»، – دەگەن ەدى مەملەكەت باسشىسى.
تاقىرىپ ءالى دە وزەكتىلىگىن جويعان جوق. جانە الداعى ۋاقىتتا دا سۇرانىس ارتا بەرمەك.
