قازاقستاندىق جەڭىل اتلەت ولگا رىپاكوۆانىڭ كۇيەۋى دەنيس رىپاكوۆ شىعىس قازاقستان وبلىسى ءماسليحاتىنىڭ توراعاسى بولىپ سايلاندى، دەپ حابارلايدى «ادىرنا» ءتىلشىسى.
سەگىزىنشى شاقىرىلعان شىعىس قازاقستان وبلىستىق ءماسليحاتىنىڭ ءى سەسسياسى 30 ناۋرىز كۇنى ءوتتى.
«وبلىستىق سايلاۋ كوميسسياسىنىڭ توراعاسى ە.نابيەۆ قاتىسۋشىلاردى وبلىستىق ءماسليحات دەپۋتاتتارىن سايلاۋ قورىتىندىلارىمەن تانىستىرىپ، دەپۋتاتتارعا دەپۋتاتتىق كۋالىكتەر مەن توسبەلگىلەردى تابىس ەتتى.
سەسسيا بارىسىندا دەپۋتاتتار ءماسليحات توراعاسى ەتىپ دەنيس سەرگەەۆيچ رىپاكوۆتى سايلادى، تۇراقتى كوميسسيالاردىڭ قۇرامىن جانە ولاردىڭ توراعالارىن سايلادى»،—دەلىنگەن حابارلامادا.
دەنيس سەرگەەۆيچ رىپاكوۆ 1980 جىلعى 20 تامىزدا الماتى قالاسىندا تۋعان.
ماماندىعى بويىنشا دەنە شىنىقتىرۋ مۇعالىمى، 2001 جىلى قازاق مەملەكەتتىك سپورت جانە تۋريزم اكادەمياسىنىڭ دەنە شىنىقتىرۋ ينستيتۋتىن اياقتاعان.
«قازاقستان رەسپۋبليكاسىنىڭ جەڭىل اتلەتيكا بويىنشا سپورت شەبەرى»، «قازاقستان رەسپۋبليكاسىنىڭ جەڭىل اتلەتيكا بويىنشا ەڭبەك سىڭىرگەن جاتتىقتىرۋشىسى» قۇرمەتتى اتاقتارىن يەلەنگەن.
