كەنتاۋ قالاسىنداعى №23 ورتا مەكتەپتىڭ بەسىنشى سىنىپ وقۋشىسى ارۋجان سمايل وقۋشىلار سارايىنداعى روبوتوتەحنيكا ۇيىرمەسىنە قاتىسادى. جاس ونەرتاپقىش تالىمگەرى اقنيەت ەلەمەسوۆانىڭ جەتەكشىلىگىمەن ءبيشى قۇلتەمىر جاسادى. بۇل تۋرالى وقۋ-اعارتۋ مينيسترلىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«باستى ماقساتىمىز – «ارقان تارتۋ»، «كوكپار»، « تەڭگە الۋ» سەكىلدى قازاقتىڭ ۇلتتىق ويىندارىن تەحنيكالىق سالامەن ۇشتاستىرۋ جانە وسكەلەڭ ۇرپاقتىڭ قىزىعۋشىلىعىن ارتتىرۋ، ولارعا جول اشۋ»،– دەيدى اقنيەت ەلەمەسوۆا.
ارۋجاننىڭ ايتۋىنشا، ۇيىرمەگە العاش قاتىسقاننان كەيىن روبوتوتەحنيكاعا دەگەن قىزىعۋشىلىق ارتقان. ول ۇلتتىق داستۇرلەردى ناسيحاتتاۋعا باعىتتالعان جوبا جاساعىسى كەلىپ، ويىن جۇزەگە اسىردى.
جەتكىنشەك «قارا جورعا» بيلەيتىن ەرەكشە روبوتتى ناۋرىز مەرەكەسىندە كوپشىلىككە كورسەتتى.
Басқалармен бөлісе отырыңыз
