ءازىربايجاننىڭ قازاقستانداعى توتەنشە جانە وكىلەتتى ەلشىسى اگالار اتاموگلانوۆپەن كەزدەستىم. كۇن تارتىبىندە مەملەكەتتەر اراسىندا مادەنيەت، سپورت جانە تۋريزم سالالارىنداعى ءوزارا ىنتىماقتاستىق تاقىرىبى بولدى.
ءازىربايجاندا قازاق مادەنيەتىنىڭ كۇندەرىن وتكىزۋ تالقىلاندى. بيىل 25-28 ءساۋىر ارالىعىندا باكۋدە بىرقاتار ءىس-شارانى، سونىڭ ىشىندە قازاقستاندىق كورنەكتى ورىنداۋشىلاردىڭ گالا-كونتسەرتىن، قۇرمانعازى اتىنداعى اكادەميالىق قازاق ۇلتتىق اسپاپتار وركەسترىنىڭ كونتسەرتىن، ءبىزدىڭ ساندىك-قولدانبالى ونەرىمىزدىڭ كورمەسىن جانە قازاقستاندىق كينو كۇندەرىن ۇيىمداستىرعىمىز كەلەدى. مەملەكەت باسشىسى ازىربايجانمەن مادەني بايلانىستاردى نىعايتۋدى تاپسىردى، سوندىقتان مۇنداي شارالار بولاشاقتا تۇراقتى بولۋى ءتيىس.
ءازىربايجان جۇرتشىلىعىنىڭ قازاق ونەرىنە دەگەن قىزىعۋشىلىعى وتە جوعارى. اتاموگلانوۆ مىرزا باكۋدە «تۇران» ەتنو-ءانسامبلى مەن «قازىنا» ۇلتتىق بي ءانسامبلىنىڭ كونتسەرتتەرىن ۇيىمداستىرۋعا دايىن ەكەنىن مالىمدەدى.
سونداي-اق، بىرلەسكەن كينەماتوگرافيالىق جوبالاردى ىسكە اسىرۋ مۇمكىندىگىن تالقىلادىق. وتكەن جىلى باكۋدە بىرنەشە ءفيلمنىڭ كورسەتىلىمى ءوتتى، ەندى بىرلەسكەن فيلمدەردى ءتۇسىرۋ جانە كينويندۋستريا سالاسىنداعى ىنتىماقتاستىقتىڭ باسقا دا مۇمكىندىكتەرىن پىسىقتاعىمىز كەلەدى.
سپورت سالاسى بويىنشا دا سويلەستىك. مىسالى، بىرلەسكەن جارىستار وتكىزۋ جانە ءازىربايجان سپورتشىلارىنىڭ قازاقستاندىق تۋرنيرلەرگە قاتىسۋى جانە ءبىزدىڭ سپورتشىلاردىڭ ءازىربايجاندا وتەتىن جارىستارعا بارۋىن تالقىلادىق.
ەكى ەلدى ورتاق جانە وتە تىعىز تاريح بايلانىستىرادى. ءبىز بەرىك قارىم-قاتىناسىمىزدى ودان ءارى نىعايتاتىن بولامىز. بۇل جۇمىستار مادەنيەت كۇندەرىن وتكىزۋمەن شەكتەلمەيدى. مىسالى، بيىل ءبىز تۇركسويدىڭ قامقورلىعىمەن بىرنەشە ءىس-شارا وتكىزۋدى جوسپارلاپ وتىرمىز.
