الماتى وبلىسى، ەڭبەكشىقازاق اۋدانىندا 14 جاسار وقۋشى كوز جۇمدى. اتا-اناسى كوز جۇمعان بالانىڭ قان قۇسىپ، قاتتى ازاپقا تۇسكەنىن ايتادى. قازاسىنىڭ ناقتى سەبەبىن دە دالەلمەن العا تارتىپ وتىر. اناسىنىڭ ايتۋىنشا، جوعارعى سىنىپ وقۋشىلارى ونى اياۋسىز سوققىعا جىعىپ، اقشا تالاپ ەتىپ كەلگەن، دەپ حابارلايدى "ادىرنا" ۇلتتىق پورتالى "كتك" تەلەارناسىنا سىلتەمە كورسەتىپ.
الماتى وبلىسىندا كوز جۇمعان 14 جاسار ايبولاتتىڭ ولىمىنە الىمجەتتىك سەبەپ بولعان. بۇل جايلى تۋىستارى حابارلادى. قارا جامىلعان وتباسى ۇلىمىزدى جوعارعى سىنىپتىڭ وقۋشىلارى مەن ستۋدەنتتەر سوققىعا جىققان دەپ وتىر. ءارى ولاردىڭ ايتۋىنشا، ءوز باۋىرلارىنا ءزابىر كورسەتكەن اۋىل سوتقارلارى ايبولاتتان ۇنەمى اقشا الىپ، كۇش كورسەتكەن.
ءىش قۇرىلىسى زاقىمدانىپ، ىشتەن قان كەتۋى سالدارىنان باقيلىق بولعان 9-سىنىپ وقۋشىسىنىڭ قاپياداعى ولىمىنە قاتىستى قىلمىستىق ءىس قوزعالىپ، سوت-مەديتسينالىق ساراپتاما تاعايىندالدى. ازامات بولار شاعىندا ۇلىنان كوز جازىپ قالعان اۋلەت قارا جامىلىپ، ەڭىرەپ وتىر. اناسى سايرات ۇعىباي قايعىلى وقيعانى كۇڭىرەنە جەتكىزدى:
- كەلدى ۇيگە، ون جارىم، ون ءبىر كەزىندە. كەلدى دە، قۇستى. قۇسقان سوڭ جەدەل جاردەم شاقىردىم. مىنە، بالاڭىزدى كورىڭىز، ىشەكتەرى جارىلىپ ىرىڭدەپ كەتكەن. ءىشىن قاتتى سوققان، قان ۇيىپ قالعان دەدى. بالام ساپ-ساۋ جۇرگەن. وسىنداي بولادى دەپ ويلامادىم.
ايبولاتتىڭ تەلەفونىن تەكسەرگەن جاقىندارى اۋىلداعى ادام كەيپىنەن كەتكەن دويىرلاردىڭ ۇنەمى وزىنەن كىشى بالالاردى بوپسالاپ، ۇرىپ-cوعىپ، اقشا جينايتىنىن ايتىپ وتىر.
ايبولاتقا قاتارلاستارى جىبەرگەن اۋديو-حابارلامالاردان بايقاعانىمىز، 9-سىنىپتىڭ وقۋشىلارى ۇلكەندەردىڭ تاپسىرماسىن بۇلجىتپاي ورىندايتىن كورىنەدى. ايبولاتتىڭ اعالارى ءىنىمىز تاياق جەپ، اۋىر جاراقاتتان باقيلىق بولعانىنا سەنىمدىمىز دەيدى. بىراق ءالى ەشكىمنىڭ قاماۋعا الىنباۋى كوڭىلگە كۇدىك ۇيالاتىپتى.
- مارقۇم بولعان ايبولاتتىڭ تەلەفونىنان جوعارى سىنىپ وقۋشىلارىنىڭ اقشا سۇراعانىن، قانشا سۇراعانىن، نە ءۇشىن سۇراعانىنا دەيىن جازىلعان. بىرەۋدىڭ Kaspi red-ءىن جاۋىپ بەرگەن. بىرەۋدىڭ ماشيناسىن جوندەۋگە العان. بىرەۋگە كاليان اكەپ بەرگەن. بىراق ەڭبەكشىقازاق اۋدانى پوليتسياسى ءبولىمىنىڭ ءىس-ارەكەتى تۇسىنىكسىز. تەرگەۋدىڭ ءادىل جۇرگىلۋىن سۇرامايمىز، تالاپ ەتەمىز، - دەدى تالعات نۇرمان، ا.مۇراتحاننىڭ اعاسى.
وسى وقيعا بويىنشا قىلمىستىق ءىس قوزعالىپ، تەرگەۋ جۇرگىزىلىپ جاتىر. پوليتسيا ءمايىتتى تەكسەرۋ بارىسىندا مارقۇمنىڭ دەنەسىنەن زورلىق-زومبىلىقتىڭ بەلگىلەرى تابىلماعانىن جەتكىزدى.
- ارىز قر قك 106-بابى بويىنشا تىركەلدى. ءمايىتتى تەكسەرۋ حاتتاماسىندا بالانىڭ دەنەسىندە زورلىق-زومبىلىقتى ءولىم بەلگىلەرى جوق ەكەندىگى انىقتالدى. ءولىم سەبەبىن انىقتاۋ ءۇشىن قاجەتتى سۇراقتار قويىلعان سوت - مەديتسينالىق ساراپتاما تاعايىندالدى. ، - دەدى الماتى وبلىستىق پد رەسمي وكىلى ەرنار ءسايدىلدين.
بالانىڭ ولىمىنە ناقتى نە سەبەپ بولعانى سوت-مەديتسينالىق ساراپتاما قورتىندىسىنان كەيىن بەلگىلى بولادى. ايبولاتتىڭ تۋعان-تۋىسى ءادىل تەرگەۋ جۇرگىزىلىپ، كىنالىلەردىڭ جازالانعانىن تالاپ ەتەدى.
"ادىرنا" ۇلتتىق پورتالى
