سىر وڭىرىندە ۇلىستىڭ ۇلى كۇنى ءاز-ناۋرىزدا 300-گە جۋىق مەرەكەلىك ءىس-شارا ۇيىمداستىرىلادى.
كۇن مەن ءتۇن تەڭەلىپ، جەر مەن كوككە جان بىتكەن ناۋرىز مەرەكەسىندە بىرقاتار الەۋمەتتىك نىسانداردا ەرەكشە شارالار وتكىزىلىپ، ايماق باسشىسىنىڭ قاتىسۋىمەن بىرنەشە سىربويىلىقتارعا باسپانا كىلتى تابىستالادى. بۇل تۋرالى وڭىرلىك كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا وبلىستىق قوعامدىق دامۋ باسقارماسىنىڭ باسشىسى الماسبەك ەسماحانوۆ حابارلادى.
-ۇلىستىڭ ۇلى كۇنى – ناۋرىز مەيرامى ىرگەسى سوگىلمەس بىرلىكتىڭ، ىرىسى توگىلمەس تىرلىكتىڭ مەرەكەسى، جۇرتشىلىقتىڭ ءبىر-بىرىمەن قۋانا قاۋىشاتىن ءساتى. وبلىس كولەمىندە ءاز-ناۋرىزدا ۇيىمداستىرىلاتىن نەگىزگى شارالار 21-22 ناۋرىز ارالىعىن قامتيدى. جالپى ناۋرىز مەرەكەسىنىڭ ناقىشىن كەلتىرەتىن قايىرىمدىلىق شاراسى دا جىل سايىن ءداستۇرلى تۇردە ۇيىمداستىرىلىپ وتىرادى. وسىعان وراي، وبلىس اكىمىنىڭ قاتىسۋىمەن «اقمەشىت-سىرداريا» مەشىتىندە «قايىرىمدى ۇلت» جالپىۇلتتىق قايىرىمدىلىق اكتسياسى وتەدى. سامارقاننىڭ كوك تاسى ەرىگەن، بارشا تۇركى حالىقتارى ءۇشىن قاسيەتتى سانالاتىن ۇلىستىڭ ۇلى كۇنى بالالار ءۇشىن دە ۇلكەن قۋانىش. ايماقتاعى بارلىق ءبىلىم بەرۋ ۇيىمدارىندا، جوعارى جانە ارناۋلى ورتا وقۋ ورىندارىندا «ناۋرىز مەيرامى» ۇعىمىنىڭ پايدا بولۋى، تاريحى بويىنشا تانىمدىق ساباقتار وتكىزىلەدى. بۇدان بولەك، وبلىستىق جاستار رەسۋرستىق ورتالىعىندا سول جاعالاۋ تۇرعىندارىنا، ونىڭ ىشىندە جاس وتباسىلار مەن جەتكىنشەكتەرگە ارناپ «تورلەت جاڭا جىلىم – ناۋرىزىم!» اتتى مەرەكەلىك كەش ۇيىمداستىرىلادى. بۇل مەرەكەدەگى تاعى ءبىر قۋانىشتى جاڭالىق، قالانىڭ سول جاعالاۋىندا 40 پاتەرلى كوپقاباتتى تۇرعىن ءۇيدىڭ كىلتى تابىستالادى، - دەدى باسقارما باسشىسى الماسبەك ابىلقاسىمۇلى.
سونداي اق، 84 پاتەرلى 7 قاباتتى تۇرعىن ءۇي قۇرىلىسىنىڭ ىرگەتاسى قالانادى. سونىمەن قاتار، رەسپۋبليكالىق «تازا تابيعات» اكتسياسىن وتكىزۋدە جوسپارلانىپ وتىر. مۇنان وزگە، مەرەكەگە ارنالعان نەگىزگى مادەني-كوپشىلىك ءىس-شارالار وبلىس كولەمىندە، ياعني قالا جانە اۋدانداردىڭ ورتالىق الاڭدارىندا وتەدى. ۇلىستىڭ ۇلى كۇنىندە بارلىق اۋداندا ناۋرىز كوجە تاراتىلىپ، اۋىلداردا ۇلتتىق سپورتتىق ويىن تۇرلەرىنەن سايىستار، ويىن-ساۋىق كەشتەرى ۇيىمداستىرىلادى. جالپى العاندا، ايماقتاعى 146 كەنت جانە اۋىلدىق وكرۋگتەردە مەرەكە اياسىندا بارلىعى 300-گە جۋىق مادەني-كوپشىلىك شارالار وتكىزىلەدى.
ال سىر ەلىنىڭ باس قالاسىندا 100-گە جۋىق مەرەكەلىك شارا ۇيىمداستىرىلادى. امال مەرەكەسىنەن باستاپ 22 ناۋرىزعا دەيىنگى 6 كۇنگە جەكە-جەكە اتاۋ بەرىلىپ، ءار كۇننىڭ ءىس-شارالار تىزبەگى بەكىتىلگەن.
-ۇلىستىڭ ۇلى كۇنى ناۋرىز مەرەكەسى جانە قىزىلوردا وبلىسىنىڭ 85 جىلدىق تورقالى تويى قارساڭىندا 85 كوپبالالى جانە از قامتىلعان بالانىڭ تۇساۋكەسەر ءراسىمى وتەدى. ونەر ارباتىن بويلاي ورنالاسقان جارتى كيىز ءۇي ءپىشىندى نىسانداردىڭ اينالاسى تاقىرىپقا سايكەس بەزەندىرىلەدى. بۇعان قوسا، «ەتنو اۋىل» سالت-داستۇرگە نەگىزدەلگەن ارنايى كورمەنى تاماشالاۋمەن جالعاسادى. مۇنان وزگە، 4 ارنايى شاتىر تىگىلىپ، وبلىسىمىزدىڭ قۇرىلۋ كەزەڭىنەن بۇگىنگە دەيىن سىر شەرتەتىن كورمە سىر ەلىنىڭ كەشەگىسى مەن بۇگىنگىسىنە باعىتتالعان. ودان كەيىن ورتالىق الاڭنىڭ نەگىزگى ساحناسىندا تاقىرىپتىق پرولوگپەن باستالاتىن كونتسەرتتىك باعدارلاماعا جالعاسادى،- دەدى جانمۇرات سەيىلوۆ.
ايتا كەتەيىك، ورتالىق الاڭدى اينالدىرا 38 كيىز ءۇي تىگىلەدى. الاڭنىڭ ءاربىر نۇكتەسىندە مەرەكە اجارىن اشاتىن مادەني، سپورتتىق شارالار ۇيىمداستىرىلىپ، بۇقارا حالىق اراسىندا ۇلتتىق سپورت تۇرلەرىنەن جارىستار وتكىزىلەدى. جارىس جەڭىمپازدارى مەن جۇلدەگەرلەرىنە ماداقتاما گراموتالارى، مەدالدار جانە سىيلىقتار تابىستالادى. مۇنان وزگە، «كولتاۋىسارلار سايىسى» ياعني قىمىز ىشۋدەن جارىس ءوتىپ، «اتامەكەن» وتباسىلىق ۇلگىدەگى بالالار اۋىلىنان شىققان جاس جۇپتىڭ بەتاشار ءراسىمى جاسالادى. سونىمەن قاتار، قولونەرشىلەردىڭ ارنايى كيىز ءۇيى تىگىلىپ، ۇلتتىق بۇيىمدار كورمەسى ۇسىنىلادى.
"ادىرنا" ۇلتتىق پورتالى
