«اق جول» پارتياسىنىڭ توراعاسى ازات پەرۋاشەۆ، پارتيا توراعاسىنىڭ ورىنباسارى قازىبەك يسا، پارتيانىڭ جەتىسۋ وبلىستىق فيليالىنىڭ توراعاسى ەرمەك ەگىنباەۆ پەن ءماجىلىس جانە جەرگىلىكتى ءماسليحات دەپۋتاتتىعىنا كانديداتتار باستاعان «اق جول» دەمپارتياسى رەسپۋبليكالىق شتابىنىڭ مۇشەلەرى تالدىقورعان قالاسىنىڭ ەڭبەك ۇجىمدارىمەن كەزدەسۋلەر وتكىزۋدە.
«اقجولدىقتار» ەلىمىزدەگى ەڭ ءىرى اككۋمۋلياتور زاۋىتى - «قاينار-ابك» جشس جۇمىسشىلارىمەن كەزدەستى. كاسىپورىندا 1200-دەن استام ادام جۇمىس ىستەپ، مەكەمە 40 جىلدان استام تابىستى دامىپ كەلەدى.
جيىن بارىسىندا پارتيا باسشىسى جۇمىسشىلارعا پارتيانىڭ ساياسي باعدارلاماسىن تانىستىرىپ، «اق جول» جۇمىسىنداعى باسىم باعىتتاردى اتادى. سونداي-اق، مۇنداي سالالارعا مەملەكەتتىك قولداۋدىڭ جاڭا تەتىكتەرى قاجەت ەكەنىن ايتتى.
قىزمەتكەرلەر باسپانانىڭ قولجەتىمدىلىگى، بجزق-داعى قاراجاتتى باسقارۋ، تۇتىنۋ نەسيەلەرىنىڭ جوعارى پايىزدىق مولشەرلەمەسى تۋرالى سۇراقتار قويدى. زەينەتكەرلىككە شىعۋ جاسىن تومەندەتۋ، ەڭبەك جاعدايلارى اۋىر، زياندى جانە اسا زياندى جۇمىسكەرلەردىڭ 1 جانە 2 تىزىمدەرىن قايتارۋ تۋرالى وتىنىشتەر ايتىلدى.
ودان كەيىن «اق جول» كانديداتتارى تالدىقورعانداعى كوپسالالى اۋرۋحانانىڭ مەديتسينا قىزمەتكەرلەرىمەن كەزدەستى. ازات پەرۋاشەۆ نارىقتىق مەديتسينالىق ساقتاندىرۋعا كوشۋ، دارىگەرلەرگە باسەكەگە قابىلەتتى ەڭبەكاقى تولەۋ، ءمامس شوتتارىن جەكەلەندىرۋ، سالاۋاتتى ءومىر سالتىن ناسيحاتتاۋ، دەنساۋلىق ساقتاۋ سالاسىن تسيفرلاندىرۋ بويىنشا پارتيانىڭ ۇستانىمىن باياندادى.
قازىبەك يسا «اق جول» فراكتسياسى مەن دەنساۋلىق ساقتاۋ مينيسترلىگى اراسىنداعى مەديتسينالىق مىندەتىن اتقارۋ كەزىندە COVID-19 ينفەكتسياسىن جۇقتىرعان مەديتسينا قىزمەتكەرلەرىنە تولەمدەردى الىپ تاستاۋعا جول بەرىلمەيتىندىگى تۋرالى وتكىر پىكىرتالاستارى تۋرالى، مەديتسينا قىزمەتكەرلەرىنىڭ قۇقىعى مەن مارتەبەسى تۋرالى زاڭ قابىلداۋ تۋرالى دەپۋتاتتىق ساۋالداردى تىلگە تيەك ەتتى.
اۋرۋحانا دارىگەرلەرى مەن مەدبيكەلەرى نەسيە پايىزىنىڭ جوعارىلىعىنا، باسپانانىڭ قولجەتىمسىزدىگىنە، جەدەل جاردەم بريگادالارىنىڭ بۇزاقىلار ارەكەتىنەن قورعالماعاندىعىنا شاعىمداندى. سۇراقتارعا جاۋاپ بەرگەن دەمپارتيا وكىلدەرى «اق جول» پارتياسىنىڭ باستاماسىمەن قابىلدانعان جەكە تۇلعالاردىڭ بانكروتتىعى تۋرالى زاڭىنىڭ قولدانۋ ءتارتىبىن ءتۇسىندىرىپ، ۇلتتىق بانكپەن نەسيە مولشەرلەمەلەرىن تومەندەتۋگە قاتىستى پىكىرتالاستارى جونىندە ايتتى.
سونداي-اق، ازات پەرۋاشەۆ سوت پروتسەسى بارىسىندا بۇرىنعى دەنساۋلىق ساقتاۋ ءمينيسترى ەلجان بىرتانوۆقا نەلىكتەن كەپىل بولعانىن دا ءتۇسىندىردى. دارىگەرلەر قاۋىمى پارتيا توراعاسىنىڭ ۇستانىمىنا ريزاشىلىق ءبىلدىرىپ، قولداۋ كورسەتتى.
جيىن سوڭىندا اقجولدىقتار دارىگەر-ايەلدەردى كەلە جاتقان مەرەكە – حالىقارالىق ايەلدەر كۇنىمەن قۇتتىقتاسا، پارتيانىڭ جەتىسۋ فيليالىنىڭ باسشىسى ەرمەك ەگىنباەۆ اۋرۋحانا ۇجىمىمەن ۇنەمى بايلانىستا بولۋعا ۋادە بەردى.
*ماتەريالدىڭ اقىسى «اق جول» دەموكراتيالىق پارتياسىنىڭ سايلاۋ قورىنان تولەندى.
