سۋ تاسقىنى جاعدايى باقىلاۋدا

1700
Adyrna.kz Telegram

كەربۇلاق جانە الاكول اۋداندارىنداعى سۋ تاسقىنى جاعدايى تۇراقتالدى. بۇل تۋرالى جەتىسۋ وبلىسى توتەنشە جاعدايلار دەپارتامەنتى باسشىسىنىڭ ورىنباسارى يگور جۋكوۆ وڭىرلىك كوممۋنيكاتسيالار الاڭىندا مالىمدەدى.

5 ناۋرىزداعى جاعداي بويىنشا كەربۇلاق اۋدانى، قىزىلجار اۋدانىندا 4 اۋلانى سۋ باسقان. وقيعا ورنىنا 19 قىزمەتكەر مەن 6 تەحنيكا جۇمىلدىرىلدى. قازىرگى ۋاقىتتا ارىق جۇيەسىن تەرەڭدەتۋ جانە تازالاۋ جۇمىستارى جۇرگىزىلىپ جاتىر.

"جەتىسۋ وبلىسى تجد-نە كەربۇلاق اۋدانى سارىوزەك-كوكتال اۆتوجولىنىڭ بويىندا 9 كم جەردە ورنالاسقان تسەمەنت ءوندىرۋ بويىنشا "Alacem" زاۋىتىنىڭ اۋماعىن سۋ باسۋ تۋرالى اقپارات تۇسكەن جوق. الايدا، الەۋمەتتىك جەلىلەردى مونيتورينگتەۋ بارىسىندا ەگىستىكتەردەن مول قار ەرۋناتيجەسىندە زاۋىت اۋماعىنىڭ ەڭىس اعىنىمەن سۋ باسقانى تۋرالى ۆيدەو ءتۇسىرىلىپ، الەۋمەتتىك جەلىلەرگە جاريالانعانى انىقتالدى. قىزمەتكەرلەردىڭ جۇمىلدىرىلۋىمەن ەرىگەن قار سۋىن بۇرۋ بويىنشام شارالار قابىلداندى. زارداپ شەككەندەر جوق. سونداي-اق، زاۋىتقا دا زالال كەلگەن جوق", - دەدى يگور جۋكوۆ.

ايتا كەتەرلىگى قۇرباندار مەن زارداپ شەككەندەر جوق.

الاكول اۋدانىنىڭ قابانباي جانە جايپاق اۋىلدارىندا دا اۋلا اۋماعىن سۋ باسۋ سالدارىنىڭ الدى الىندى. جەرگىلىكتى جەرلەردە جەكە قۇرامنىڭ 10 قىزمەتكەرى مەن 3 تەحنيكا جۇمىلدىرىلدى. قۇرباندار مەن زارداپ شەككەندەر جوق.

ال، ەسكەلدى اۋدانىندا قاردىڭ قارقىندى ەرۋى مەن ارىق جۇيەسىنىڭ تازالانباۋى سالدارىنان جالعىزاعاش اۋىلىنىڭ ماڭىنداعى جول بولىگى سۋ استىندا قالدى. قۇتقارۋشىلار شۇعىل تۇردە وقيعا ورنىنا بارىپ، كانالداردى تەرەڭدەتۋ جانە تازالاۋ جۇمىستارىن جۇرگىزدى. ايتا كەتەرلىگى ەرىگەن سۋ بيعاش وزەنىنە ترانزيتتىك رەجيمدە وتەدى.

«قازگيدرومەت» رمك داۋىلدى ەسكەرتۋىنە سايكەس، جاڭبىر تۇرىندەگى جاۋىن-شاشىن بولجامىنا، سونداي-اق، 2023 جىلعى 6-8 ناۋرىز ارالىعىنداعى كەزەڭدە تەمپەراتۋرالىق فوننىڭ جوعارىلاۋىنا بايلانىستى قاردىڭ قارقىندى ەرۋى كۇتىلۋدە. جەتىسۋ وڭىرىندە ەرىگەن جانە ەڭىس اعىنىنىڭ قالىپتاسۋى، مۇز قۇبىلىستارىنىڭ السىرەۋى جانە وزەندەردەگى سۋ دەڭگەيىنىڭ كوتەرىلۋى، بۇل رەتتە سۋدىڭ توگىلۋى مەن سۋ باسۋى مۇمكىن»، - دەدى سپيكەر.

جالپى، جەتىسۋ وڭىرىندەگى سۋ تاسقىنى جاعدايى باقىلاۋدا. سۋ تاسقىنىنىڭ الدىن الۋ ءۇشىن تجد قىزمەتكەرلەرى ازاماتتاردى كانال جۇيەلەرىن تازارتۋعا جانە اۋلا اۋماقتارىن تازالاۋعا كومەكتەسۋگە شاقىرادى.

پىكىرلەر