قازاقستاندىق كاسىپقوي بوكسشى جانىبەك ءالىمحانۇلى ورتا سالماقتاعى دۇنيەجۇزىلىك بوكس ۇيىمى (WBO) نۇسقاسى بويىنشا الەم چەمپيونى اتاعىنان باس تارتتى، دەپ حابارلايدى "ادىرنا" ۇلتتىق پورتالى.
بۇل تۋرالى WBO پرەزيدەنتى گۋستاۆو وليۆەري The Ring باسىلىمىنا بەرگەن سۇحباتىندا ايتتى. سپورتشى ەكىنشى ورتا سالماق دارەجەسىنە اۋىساتىنىن حابارلاعان. ونىڭ مالىمەتىنشە، ءالىمحانۇلىنىڭ چەمپيوندىق بەلبەۋى ۋاقىتشا چەمپيون مارتەبەسىنە يە بولعان ۇلىبريتانيا وكىلى دەنزەل بەنتليگە بەرىلەدى. ال جاقىن ۋاقىتتا WBO جاڭا چەمپيوننىڭ مىندەتتى قارسىلاسىن انىقتايدى. نەگىزگى ۇمىتكەرلەردىڭ ءبىرى – كۋبالىق يونلي ەرناندەس.
جانىبەك ءالىمحانۇلى بۇعان دەيىن ورتا سالماقتا IBF جانە WBO تۇجىرىمدارى بويىنشا چەمپيوندىق بەلبەۋلەردىڭ يەگەرى بولعان. كەيىن IBF ۇيىمى دوپينگكە قاتىستى جاعدايدان كەيىن قازاقستاندىق بوكسشىنى چەمپيوندىق اتاعىنان ايىرىپ، 2026 جىلدىڭ جەلتوقسانىنا دەيىن جارىستاردان شەتتەتكەن. WBO ۇيىمى دا ءبىر جىلدىق ديسكۆاليفيكاتسيا تاعايىنداعانىمەن، چەمپيوندىق بەلبەۋدى ساقتاپ قالعان ەدى. ەندى قازاقستاندىق بىلعارى قولعاپ شەبەرى WBO چەمپيوندىق اتاعىنان ءوز ەركىمەن باس تارتىپ، جاڭا سالماق دارەجەسىندە ونەر كورسەتۋدى جوسپارلاپ وتىر.
قازاقستاننىڭ كاسىپقوي بوكس فەدەراتسياسىنىڭ پرەزيدەنتى راقىمجان ەردەنبەكوۆتىڭ پىكىرىنشە، بۇل شەشىم جانىبەك ءالىمحانۇلىنىڭ اۋقىمدى جەكپە-جەكتەرگە جول اشۋ نيەتىمەن بايلانىستى بولۋى مۇمكىن. ونىڭ ايتۋىنشا، قازاقستاندىق بوكسشىنىڭ باستى ماقساتتارىنىڭ ءبىرى – مەكسيكالىق الەم چەمپيونى ساۋل «كانەلو» الۆارەسپەن كەزدەسۋ.
