تەمىرتاۋلىق پوليتسەيلەر بەس قاباتتى ءۇيدىڭ توبەسىنەن سەكىرمەكشى بولعان ازاماتتى امان الىپ قالدى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
2 ناۋرىز كۇنى ساعات 15:30 شاماسىندا تەمىرتاۋ قالالىق پوليتسيا باسقارماسىنىڭ جەدەل باسقارۋ ورتالىعىنا 9-ىقشام اۋداندا ورنالاسقان بەس قاباتتى ءۇيدىڭ توبەسىندە ەر ادام ءوز-وزىنە قول جۇمساپ، سەكىرمەكشى بولىپ جاتقانى تۋرالى حابارلاما ءتۇستى. وقيعا ورىنىنا سول ماڭعا جاقىن قالالىق پوليتسيا باسقارماسى پاترۋلدىك پوليتسيا باتالونىنىڭ جاساقتارى، قۇرامىندا ۆزۆود كومانديرى سۇيىندىك يمانگاليەۆ قىزمەت ينسپنەكتورى بەكبولات ساگاديەۆ، سونداي-اق ەكىنشى ەكيپاج نۇرلان سەرىكوۆ پەن رۇستەم ەلەۋكەن جىبەرىلگەن.
وقيعا ورىنىنا كەلگەن پوليتسيا قىزمەتكەرلەرى ءۇيدىڭ توبەسىندە وتىرعان جاسى 35 شاماسىنداعى ازاماتتى بايقاعان. ۇستىندە كۇرتەسى بار ازامات شاتىردىڭ شەتىندە وتىرىپ، ەگەر ماعان جاقىنداساڭدار توبەدەن سەكىرەمىن دەگەن.
– بۇنداي جاعدايدا ەڭ باستىسى ادامنىڭ كوڭىلىن اۋلاپ، شۇعىل شەشىمگە بارماۋى ءۇشىن ارەكەت ەتۋ باستى مىندەتىمىز بولدى. سوندىقتان مەن ارىپتەسىم ەكەۋىمىز ودان نە بولعانىن سۇراپ، قاندايدا ءبىر كومەك كەرەكپە دەگەن ساۋالدار قويدىق. سويتسەك، ول جولداسىمەن ۇرىسىپ قالعاندىقتان، وسىنداي شەشىمگە بارماق بولعان. ءبىز ودان جولداسىنىڭ تەلەفون ءنومىرىن الىپ، جولداسىمەن سويلەسىپ، ونى كەشىرگەنىن جانە ۇيىنە بارۋعا بولاتىنىن ايتتىق، – دەيدى سۇيىندىك يمانگاليەۆ.
ءتارتىپ ساقشىلارى ازاماتپەن سويلەسىپ جاتقاندا قىزمەت ينسپەكتورلارى نۇرلان سەرىك پەن رۇستەم ەلەۋكەن بەسىنشى قاباتقا كوتەرىلگەن.
– توبەدە وتىرىپ، تومەندە تۇرعان ارىپتەستەرىمىزبەن سويلەسىپ وتىرعان ازاماتتى كوردىك. سوسىن وعان بىلدىرتپەي ارتىنان بارىپ، ونى ۇستاپ الىپ، قاۋىپسىز جەرگە اپاردىق، – دەيدى نۇرلان سەرىك.
ازاماتتى جەرگە ءتۇسىرىپ، مەديتسينالىق تەكسەرىستەن وتكىزگەننەن كەيىن وقيعانىڭ ءمان-جايىن انىقتاۋ ماقساتىندا ول پوليتسيا بولىمىنە جەتكىزىلدى.
