وسىدان تۋرا ءجۇز جىل بۇرىن لوندوندا «PEN» حالىقارالىق جازۋشىلار ۇيىمىنىڭ العاشقى جيىنى ءوتتى. ۇيىمنىڭ اتاۋى اعىلشىن تىلىندەگى «poets» - اقىندار، «essayists» - وچەركشىلەر جانە «novelists» - جازۋشىلار دەگەن ءۇش ءسوزدىڭ العاشقى ارىپتەرىنەن قۇرالعان. سونداي-اق، تۇماندى البيون حالقى «pen» دەپ قالامدى اتايدى.
القيسسا، 1986 جىلى ۇيىمنىڭ 48-ءشى حالىقارالىق كونگرەسسىندە جۇزدەن استام مەملەكەتتەن جيىلعان ۇيىم وكىلدەرى 3 ناۋرىزدى «جازۋشىلاردىڭ حالىقارالىق بەيبىتشىلىك كۇنى» دەپ جاريالادى. سول ساتتەن باستاپ بۇل كۇن الەمنىڭ تۇكپىر-تۇكپىرىندە «جازۋشىلار كۇنى» رەتىندە اتاپ وتىلۋدە. ءسوز ەركىندىگى ءۇشىن كۇرەسىپ، قوعامدى جالعان اقپاراتتان قورعاپ جۇرگەن جازۋشىلار مەن جۋرناليستەردىڭ مۇددەلەرىن ءبىر ارناعا توعىستىرۋ – بۇل كاسىبي مەرەكەنىڭ باستى ماقساتىنا اينالدى.
قالامگەرلەر مەيرامى وڭىرىمىزدەگى اقىن-جازۋشىلاردى دا اينالىپ وتپەدى. اقمولا وبلىسىنىڭ مادەنيەت باسقارماسى بۇگىن ادەبيەت جانە ونەر مۋزەيىنىڭ قابىرعاسىندا جەرگىلىكتى قالامگەرلەردىڭ باسىن قوسىپ، كوركەم ءسوز شەبەرلەرىن كاسىبي مەرەكەمەن قۇتتىقتادى.
«ءاربىرىڭىزدى ءوڭىرىمىزدىڭ تانىمال، بەدەلدى ازاماتى دەپ بىلەمىز. سىزدەردى وسىناۋ كاسىبي مەرەكەمەن شىن جۇرەكتەن قۇتتىقتايمىز. اقمولا وبلىسىنىڭ رۋحاني ءارى مادەني دامۋىنا قوسىپ جاتقان ۇلەستەرىڭىز ءۇشىن زور العىس ايتامىز. بارشاڭىزعا شىعارماشىلىق تابىس، سارقىلماس شابىت تىلەيمىز» - دەدى باسقارما باسشىسى ايگۇل ءسابيتوۆا.
سونىمەن قاتار، ۆەدومستۆو باسشىسى جيىنعا قاتىسقان قالامگەرلەردى ەل مۇددەسى ءۇشىن بىرلەسىپ جۇمىس ىستەۋگە شاقىردى. اقىن-جازۋشىلار قاۋىمى تاراپىنان ءوڭىر مادەنيەتىن وركەندەتۋگە قاتىستى ءبىرشاما ۇسىنىس ايتىلدى، مادەنيەت باسقارماسىنىڭ تاياۋ جىلداردا جەرگىلىكتى قالامگەرلەرمەن بىرىگىپ اتقاراتىن جۇمىستارى جوسپارلاندى.
