«اق جول» دەمپارتياسىنىڭ سايلاۋالدى ۇگىت-ناسيحات توبى ەل اۋماعى بويىنشا حالىقپەن، ەڭبەك ۇجىمدارىمەن كەزدەسۋلەرىن وتكىزۋدە.
بۇگىن رەسپۋبليكالىق شتاب مۇشەلەرى عاني حامزين، قاراعاندى وبلىستىق شتاب مۇشەلەرى مارينا شيللەر، ويرات نۇرقازوۆ پارتيانىڭ قاراعاندى وبلىستىق فيليالىنىڭ توراعاسى ەرمەك ءابىلدين جانە جەرگىلىكتى ءماسليحات دەپۋتاتتىعىنا ۇمىتكەرلەرمەن بىرگە قاراعاندى وبلىسىنىڭ ۇجىمدارىمەن جۇزدەستى.
«اقجولدىقتار» «Eurasian Foods» اق جۇمىسكەرلەرىمەن كەزدەسىپ، پارتيا ساياسي باعدارلاماسىنىڭ التى باسىم باعىتىن تانىستىردى. سونىڭ ىشىندە كاسىپكەرلىكتى قولداۋ ماسەلەسىنە جان-جاقتى توقتالدى.
- «ءبىز جۇيەلى دەڭگەيدەگى دە، بىردەن قاراستىرۋدى قاجەت ەتەتىن ماسەلەلەردى دە نازاردا ۇستايمىز. جۇيەلى ماسەلەلەرگە كەلەتىن بولساق، بۇل، مىسالى، «جەكە تۇلعالاردىڭ بانكروتتىعى تۋرالى» زاڭ. بۇل ماسەلەنى 10 جىلدان استام ۋاقىت بويى كوتەرىپ كەلەمىز. زاڭ 3 ناۋرىزدان باستاپ كۇشىنە ەنەدى. سونىمەن قاتار، سارالانعان سالىق مولشەرلەمەلەرى سياقتى جۇيەلى پروبلەمالار بار. بىزدە قازىر بارلىعىنا بىردە 12% ققس پەن 20% ۇتس قولدانادى. ياعني، سىزدەر سياقتى ازىق-تۇلىك وندىرەتىن كاسىپورىندارعا دا، مۇنايشىلار مەن بانكتەرگە دە بىردەي تاريف قاراستىرىلعان. بۇل ادىلەتتى مە؟ «اق جول» دەمپارتياسى ءادىل سالىقتى تالاپ ەتەدى. ونىڭ اسەرى قانداي؟ ونىڭ اسەرى تۇتىنۋشىلار ءۇشىن ءونىم باعاسىنىڭ ارزاندىعى مەن سالىقتىڭ از بولۋى سەبەپتى جۇمىسشىلارعا جالاقى ءوسىرۋ مۇمكىندىگىنىڭ پايدا بولاتىندىعىندا. بۇل ءبىزدىڭ باعدارىمىز. كاسىپكەرلىكتى، شاعىن جانە ورتا بيزنەستى، سىزدەر سياقتى ۇجىمداردى قولداۋ. سىزدەرگە جۇمىس ىستەۋگە ىڭعايلى، شەتەلدىك وندىرۋشىلەرمەن سالىستىرعاندا باسەكەگە قابىلەتتى بولۋلارىڭىز ءۇشىن»، - دەدى عاني حامزين.
پارتيانىڭ سايلاۋالدى باعدارلاماسىمەن تانىستىرعان سوڭ، كانديداتتار پارلامەنتتە اتقارىلعان جۇمىستار تۋرالى ايتتى. جۇمىسشىلار كوكەيدەگى سۇراقتارىن قويدى. كوپشىلىكتى الەۋمەتتىك ادىلەتتىلىك، سىبايلاس جەمقورلىقپەن كۇرەس، ءادىل سايلاۋ ماسەلەلەرى قىزىقتىردى.
سونداي-اق، سول كۇنى رەسپۋبليكالىق شتاب مۇشەلەرى ساران قالاسىنىڭ ورتالىق اۋرۋحاناسىنا باردى. «اق جول» پارتياسىنىڭ كانديداتتارى پارتيانىڭ ساياسي باعدارلاماسىن تانىستىرىپ، دارىگەرلەردىڭ سۇراقتارىنا جاۋاپ بەردى.
اڭگىمە بارىسىندا مەديتسينالىق ساقتاندىرۋ، «دارىگەرلەر مەن مەديتسينا قىزمەتكەرلەرىنىڭ مارتەبەسى تۋرالى» زاڭ قابىلداۋ، دارىگەرلەردىڭ تاۋەكەلدەرى ءۇشىن تولەمدەردى بەكىتۋ، كاسىبي جانە ادامي ابىرويدى قورعاۋ ماسەلەلەرى كوتەرىلدى.
سونىمەن بىرگە، «اقجولدىقتار» ساران قالاسىنىڭ تۇرعىندارىمەن ەلەكتر قۋاتىمەن قامتاماسىز ەتۋ ماسەلەلەرى بويىنشا جيىن وتكىزدى. تۇرعىنداردى قالانىڭ ينفراقۇرىلىمى، الەۋمەتتىك ادىلەتتىلىك پەن يپوتەكالىق نەسيە ماسەلەلەرى تولعاندىردى. قاتىسۋشىلار ۇمىتكەرلەرگە سۇراقتار قويىپ، ۇسىنىستارى جانە شاعىمدارىمەن ءبولىستى.
"ادىرنا" ۇلتتىق پورتالى
