رەسەي-ۋكراينا سوعىسىنىڭ 1 جىلىنا شولۋ

2270
Adyrna.kz Telegram

2022 جىلدىڭ 24 اقپانىندا رەسەي ۋكرايناعا باسىپ كىردى. سودان بەرى ەل تۇرعىندارىنىڭ ۇشتەن ءبىرى ۇيلەرىن تاستاپ كەتۋگە ءماجبۇر بولدى، مىڭداعان ادام قازا تاپتى، كوپتەگەن مەكتەپ، اۋرۋحانا مەن مادەني ورىن قيرادى. بۇدان بولەك 1 جىل ىشىندە  بىرىنشە وقيعا بولدى.

قازا تاپقاندار مەن جارالانعاندار

رەسەيدىڭ ۋكرايناعا باسىپ كىرۋىنەن كەمىندە 8 006 ادام قازا تاپتى. ولاردىڭ ىشىندە 487 بالا بار. 13 287 ادام جاراقات الدى. بۇل دەرەكتەرگە بۇۇ تەكسەرگەن جاعدايلار عانا كىرەدى.

«ناقتى ساندار بىرنەشە ەسە كوپ بولۋى مۇمكىن»،—دەيدى ۇيىم.

رەسەيدىڭ اسكەري باسقىنشىلىعىنا بايلانىستى ۋكراينادا 13 ميلليون ادام ۇيلەرىن تاستاپ كەتۋگە ءماجبۇر بولدى. بۇل بۇكىل ەل حالقىنىڭ ۇشتەن ءبىرىن قۇرايدى. قازىر سەگىز ميلليوننان استام ادام ەۋروپادا بولسا، بەس ميلليونعا جۋىق ۋكرايندىق بوسقىنعا اينالدى.

سوعىس باستالعاننان بەرى ۋكراينا 63 مىڭنان استام قىلمىستىق ءىس قوزعادى. ولاردىڭ 50 مىڭنان استامى سوعىس زاڭدارى مەن ادەت-عۇرىپتارىن بۇزۋمەن بايلانىستى.

سەكسۋالدىق زورلىق-زومبىلىققا بايلانىستى اسكەري قىلمىستاردى تەرگەۋ دەپارتامەنتىنىڭ مالىمەتىنشە، جۇزدەگەن ادام رەسەيلىك اسكەريلەردەن سەكسۋالدىق زورلىق-زومبىلىق كورگەن. بىراق ولاردىڭ 155-ءى عانا ءوز ىستەرىن سوتقا بەرىپ، بولعان جايت تۋرالى اشىق ايتۋعا كەلىسكەن. سوتقا تۇسكەن ىستەردىڭ باسىم كوپشىلىگى ايەلدەرگە قاتىستى. سونداي-اق كامەلەتكە تولماعاندارعا زورلىق-زومبىلىق كورسەتۋ بويىنشا كەمىندە 11 ءىس قاراۋعا جىبەرىلدى.

سوعىس بالالاردى ءبىلىمسىز قالدىردى

باسقىنشىلىق سالدارىنان كەم دەگەندە 3139 ءبىلىم بەرۋ نىسانى زاقىمداندى. ونىڭ ىشىندە 441 وقۋ ورنى تولىعىمەن قيراعان.

يۋنيسەف باعالاۋى بويىنشا، رەسەيدىڭ باسقىنشىلىعى ۋكرايناداعى كەمىندە بەس ميلليون بالانىڭ ءبىلىم الۋىنا ايتارلىقتاي شەكتەۋ قويدى. ءبىلىم وشاقتارىنا ءجيى وق جاۋدىراتىندىقتان، اتا-انالار بالالارىن مەكتەپكە جىبەرۋدەن باس تارتتى.

 

پىكىرلەر