بۇگىن بۇقارالىق اقپارات قۇرالدارىنىڭ وكىلدەرى «AMANAT» پارتياسى رەسپۋبليكالىق سايلاۋالدى شتابىنىڭ جۇمىسىمەن تانىستى. جۋرناليستەر ءۇشىن ۇيىمداستىرىلعان پرەسس-تۋر بارىسىندا «AMANAT» پارتياسىنىڭ اتقارۋشى حاتشىسى ەلنۇر بەيسەنباەۆ باق وكىلدەرىن كانديداتتاردىڭ ۇگىت-ناسيحات جانە ۇيلەستىرۋ ورتالىقتارىنىڭ، قوعامدىق قابىلداۋ بولمەسىنىڭ، مەديا-شتابتىڭ، كوۆوركينگ الاڭىنىڭ، سونداي-اق شتابتاعى جاستار سەكتورىنىڭ جۇمىسىمەن تانىستىردى، دەپ حابارلايدى “ادىرنا” ۇلتتىق پورتالى.
تارقاتا ايتساق، سايلاۋالدى شتاب «open space» قاعيداتى بويىنشا ۇيىمداستىرىلعان. ياعني، بۇل شتاب – كوپفۋنكتسيالى سايلاۋ ناۋقانىن باسقارۋ ورتالىعى. ونىڭ قۇرامىندا كانديداتتاردىڭ ۇگىت-ناسيحات جانە ۇيلەستىرۋ ورتالىقتارى، قوعامدىق قابىلداۋ بولمەسى، سايلاۋشىلارمەن كەزدەسۋلەر وتەتىن كوۆوركينگ ورتالىعى، ۇگىت-ناسيحات ءۇشىن كونتەنت ءتۇسىرۋ مۇمكىندىگىنە يە بىرنەشە لوكاتسيالى ءباسپاسوز الاڭى، مەديا-شتاب، باقىلاۋشىلار مەن سەنىمدى تۇلعالاردى وقىتۋ ورتالىعى بار، سونداي-اق جاستار سەكتورى جۇمىس ىستەيدى.
«شتابتىڭ نەگىزگى قىزمەتى – جۇمىسىمىزدىڭ دۇرىس ءجۇرۋىن قامتاماسىز ەتۋ. بۇل شتابتىڭ جاڭالىعى رەتىندە كۇندەلىكتى تۇردە جاڭا فورماتتاعى 4-5 كەزدەسۋ، وقىتۋ ساباقتارى ءوتىپ تۇراتىنىن ايتۋعا بولادى. شتاب 24/7 رەجيمىندە قىزمەت ەتەدى. وڭىردەگى ءاربىر شتاب وسى فورماتتا جۇمىس ىستەيدى. ءار ءبولىم بىرلەسىپ جانە جەدەل تۇردە بەلگىلى ءبىر شەشىمدەر قابىلدايدى. مۇندا كانديداتتار مەن سەنىمدى وكىلدەردىڭ قاتىسۋىمەن كۇندەلىكتى ءتۇرلى ءىس-شارالار، ارنايى وقىتۋلار وتكىزىلەدى»، - دەپ اتاپ ءوتتى ەلنۇر بەيسەنباەۆ.
سايلاۋالدى شتابتىڭ ءباسپاسوز ورتالىعىندا رەسپۋبليكالىق جانە وڭىرلىك دەڭگەيدەگى بارلىق اقپاراتتىق جۇمىس ورتالىقتاندىرىلعان. سايلاۋداعى ماڭىزدى باعىت – اقپاراتتىق جۇمىس ەكەندىگىن ەسكەرسەك، اتقارىلعان شارۋادان اقپاراتتاندىرىپ، جۇزەگە اسقان باستامالاردى كورسەتۋ، قوعامعا جەتكىزۋ – اسا ماڭىزدى. سوندىقتان 17 وبلىستىق جانە 3 قالالىق مەديا-جوسپار مەن 1 رەسپۋبليكالىق مەديا جوسپار ازىرلەنگەن. وندا ءار كۇننىڭ كەستەسى بەكىتىلگەن. بۇل اقپاراتتىق جۇمىس وسى مەديا-شتاب ورتالىعىندا جۇزەگە اسىرىلادى.
سايلاۋالدى شتابتىڭ جاستار سەكتورىنىڭ دا جۇمىسى اۋقىمدى. ول جەردە بەلسەندى جاقتاستاردىڭ قاتىسۋىمەن كەزدەسۋلەر وتەدى. وندا سايلاۋالدى باعدارلاماسىن حالىققا جاستاردىڭ تىلىمەن جەتكىزۋ ءۇشىن الەۋمەتتىك جەلىدە كرەاتيۆتى يدەيالاردى توپتاستىرۋ جۇمىستارى جۇزەگە اسىرىلۋدا.
پرەسس-تۋر بارىسىندا پارتيانىڭ سايلاۋالدى سايتى دا تانىستىرىلدى. «قازىر سايت سايلاۋالدى شتابقا قاتىستى جاساقتالدى. حالىقپەن بىرگە جازىلعان باعدارلاما 10 باعىتتان تۇرادى. بۇل باعدارلامانى ازىرلەۋدە پرەزيدەنتتىك سايلاۋدىڭ قورىتىندىسى بويىنشا تۇسكەن 56 مىڭنان استام ۇسىنىس تا ەسكەرىلدى. وعان قوسا، رەفەرەندۋمدا جينالعان ۇسىنىس بار. ءبىر جىلدىڭ ىشىندە قوعامدىق قابىلداۋ 134 مىڭنان استام ازاماتتى قابىلدادى. وسى ۇسىنىس-تىلەكتەردىڭ بارلىعىن قامتۋعا تىرىستىق. باعدارلامانىڭ تاعى ءبىر ەرەكشەلىگى - ونىڭ قورىتىندىسى بويىنشا ارنايى جول كارتاسى ازىرلەندى. قازىردىڭ وزىندە وندا 300-دەن استام پۋنكت بار. 20 وڭىردە جول كارتاسى دايارلاندى»، - دەدى ەلنۇر بەيسەنباەۆ.
كەزدەسۋ قورىتىندىسىندا باق وكىلدەرى ءۇشىن بريفينگ وتكىزىلدى. ونىڭ بارىسىندا «AMANAT» اتقارۋشى حاتشىسى ەلنۇر بەيسەنباەۆ جۋرناليستەردىڭ سۇراقتارىنا جاۋاپ بەردى.
ەلنۇر بەيسەنباەۆتىڭ ايتۋىنشا، ەل اۋماعىندا بارلىق وڭىردە اۋدان، وبلىس جانە رەسپۋبليكالىق دەڭگەيدە سايلاۋالدى شتابتار جۇمىس ىستەپ جاتىر. 226 وڭىرلىك جانە اۋماقتىق سايلاۋالدى شتابتارىنىڭ جۇمىسىنا 7,5 مىڭعا جۋىق ادام جۇمىلدىرىلعان.
سايلاۋ ناۋقانى باستالعاننان بەرى ەل اۋماعىندا 3 مىڭنان استام ءىس-شارا ءوتتى. ۇگىت-ناسيحات ناۋقانىنىڭ قورىتىندىسى بويىنشا 1 ملن. استام ادامنىڭ قاتىسۋىمەن 30 مىڭ ءىس-شارا وتكىزۋ جوسپارلانۋدا.
ايتا كەتەرلىگى، شتاب قۇرامىنا پارتيانىڭ 486 بەلسەندى جاقتاستارى كىردى. سايلاۋشىلارمەن كەزدەسۋ كەستەسى دايىندالدى. سونداي-اق، بۇل جۇمىسقا ۇمىتكەرلەردىڭ 27 مىڭنان استام سەنىمدى وكىلدەرى دە تارتىلدى.
ەستەرىڭىزگە سالا كەتسەك، «AMANAT» پارتياسى اتىنان ماجىلىسكە 119 كانديدات ۇسىنىلىپ وتىر. ونىڭ ىشىندە پارتيالىق ءتىزىم بويىنشا 90 ادام، بىرمانداتتىق سايلاۋ وكرۋگتەرىنەن 29 ادام ۇسىنىلىپ وتىر.
