الماتى وبلىسىندا رەسپۋبليكالىق پاندەر وليمپياداسىنىڭ ءۇشىنشى وبلىستىق كەزەڭىنىڭ جابىلۋ سالتاناتىنى ءوتتى. بىلىمدىلەر باسەكەسىندە 582 بالا باق سىناعان ەدى، ولاردىڭ 258-ءى جۇلدەگەرلەر قاتارىنان كورىندى.
وقۋدا وزا شاپقان جاس ورەندەردى ءوڭىردىڭ باس ۇستازى سالتانات بەسپاەۆا قۇتتىقتاپ، ارنايى ديپلومداردى تابىس ەتتى.
«ءبىر اپتا بويى وتكەن ءبىلىم سايىسىندا دارىندى وقۋشىلاردى جەڭىسىمەن قۇتتىقتايمىن. وليمپيادانىڭ اۋداندىق جانە قالالىق كەزەڭىندە 6 مىڭعا جۋىق وقۋشى قاتىسسا، وبلىستىق كەزەڭدە 582 وقۋشى سىناق تاپسىردى. ءبىلىم سايىسىنىڭ بارلىق كەزەڭىندە اشىقتىق پەن اكادەميالىق ادالدىق تالاپتارى ساقتالدى. وليمپايدانىڭ قوس كەزەڭىدە وڭاي بولعان جوق. بۇل سىناققا دايىندىق تەك مەكتەپ باعدارلاماسىمەن شەكتەلىپ قالماي، تەرەڭ زەردەلەۋدى قاجەت ەكەنىن ۇعىندىردى. سىزدەر ەلىمىزدىڭ ناعىز «التىن قورىسىزدار». ەل ەرتەڭى وزدەرىڭىزدىڭ قولدارىڭىزدا»،-دەدى قۇتتىقتاۋ سوزىندە الماتى وبلىسى ءبىلىم باسقارماسىنىڭ باسشىسى سالتانات داۋىسپەكقىزى.
ارتىنشا ول ءبىلىم تەڭىزىندە ەركىن جۇزگەن جاس دارىندارعا لايىقتى ماراپاتىن تاپسىردى.
وبلىستىڭ «سەن تۇر، مەن اتايىن» دەگەن جاستارى جينالعان بىلىمدىلەر دوداسىندا وزا شىققانداردىڭ ءبىرى ەسىك «ءبىلىم-يننوۆاتسيا» ليتسەيىنىڭ 10 سىنىپ وقۋشىسى ءمۇسلىم حالەل.
«وليمپياداعا 4 جىل قاتارىنان قاتىسىپ كەلە جاتىرمەن. مەن ماتەماتيكا بويىنشا تەست تاپسىردىم. تاپسىرمالاردىڭ دەڭگەيى وڭاي دەپ ايتۋعا كەلمەيدى دەگەنمەندە، بۇل سىندا سۇرىنبەگەنىمە قۋانىشتىمىن. مەنى دايىنداپ، قولداۋ كورسەتكەن جەتەكشىم اديكەي الىبەكۇلىنا العىسىمدى بىلدىرەمىن»،-دەيدى وليمپيادانىڭ 1 ورىن جۇلدەگەرى ءمۇسلىم حالەل.
ەستەرىڭىزگە سالامىز، ءوڭىردىڭ ەڭ زياتكەر وقۋشىلارى 13-18 اقپان ارالىعىندا جاراتىلىستانۋ-ماتەماتيكالىق جانە قوعامدىق-گۋمانيتارلىق باعىتتاعى جالپى سانى 15 پاننەن سىناق تاپسىردى. وليمپيادا «El Umiti تسيفرلىق ونلاين پلاتفورماسى» اقپاراتتىق جۇيەسىندە «1 كومپيۋتەر – 1 وقۋشى – 1 كامەرا» قاعيداتى بويىنشا وتكىزىلدى.
تەمىردەي تارتىپتە ۇيىمداستىرىلعان بۇل سايىستا سۇرىنبەگەندەر لايىقتى تۇعىرلارىنان كورىندى.
«وليمپيادانىڭ تالابىنا سايكەس، قاتىسقان وقۋشىلاردىڭ 45 پايىزى جەڭىمپاز اتاندى. ونىڭ ىشىندە جەڭىمپاز وقۋشىلاردىڭ 20 پايىزى 1 ورىن، ەكىنشى ورىندى قاتىسۋشىلاردىڭ 30 پايىزى يەلەنسە، قالعان 50 پايىزى 3 ورىننان كورىندى»،-دەدى «جاس دارىن» ورتالىعىنىڭ ديرەكتورى ديانا تەتەنقىزى.
ايتك كەتەيىك، الداعى ناۋرىز-ءساۋىر ايلارىندا شىمكەنت قالاسىندا رەسۋپبليكالىق وليمپيادا وتەدى. وعان الماتى وبلىسىنان جاراتىلىستانۋ-ماتەماتيكالىق باعىتىندا 38 وقۋشى، قوعامدىق-گۋمانيتارلىق پاندەر بويىنشا 36 بالا سىناق تاپسىراتىن بولادى.
