تۇركىستان وبلىسىنىڭ تۇرعىنى مەيىرحان توپانباي 10 تىلدە ەركىن سويلەيدى. ول مۇمكىندىگىم شەكتەۋلى دەپ قاراپ وتىرماي، ۋاقىتىن ءتىل ۇيرەنۋگە جۇمساعان، دەپ حابارلايدى «ادىرنا» ءتىلشىسى «حابار 24»-كە سىلتەمە جاساپ.
تۋعاننان سال اۋرۋىنا شالدىققان جىگەرلى جىگىت اۋىل كىتاپحاناسىندا جۇمىس ىستەيدى. 29 جاستاعى مەيىرحان توپانباي ورتا مەكتەپتى ۇزدىك وقىپ، ەكى بىردەي ماماندىقتى مەڭگەرگەن. ءتىل ۇيرەنىپ، وزگە ۇلتتىڭ شىعارمالارىمەن تانىسۋعا بالا كەزدەن قۇمار بولىپتى. بۇگىندە تۇرىك، پارسى، نەمىس، گرەك، يسپان تىلدەرىمەن قاتار ارميان، پولياك، تاجىك، فرانتسۋز تىلدەرىن جەتىك بىلەدى. سونداي-اق ءوز بەتىنشە اعىلشىن سابىعىن وقىپ، ءتىل سىندىرىپ ءجۇر.
«تۇرىك ءتىلى، گرەك ءتىلىن مەن بالا كەزىمنەن ۇيرەندىم. ودان كەيىن مەكتەپكە بارعاننان كەيىن نەمىس ءتىلىن ۇيرەندىم، فرانتسۋز ءتىلىن ۇيرەندىم. سونىمەن التى ءتىل بولدى ما؟ سودان سوڭ ۋنيۆەرسيتەتكە بارعاندا پارسى جانە تاجىك ءتىلىن ۇيرەندىم. ودان سوڭ پولياك پەن بولگار ءتىلى بار عوي، سول ەكى ءتىلدى يگەردىم. سودان سوڭ يسپان ءتىلى، قازىر ءمىنى يتاليان ءتىلىن ۇيرەتىپ جاتىرمىن. مۇگەدەك بولسام دا، ماسىل بولعىم كەلمەيدى»،- دەيدى ىزدەنىمپاز جىگىت.
مەيىرحان توپانباي ءبىر كوزىنىڭ كورمەيتىنىنە قاراماستان، كىتاپ وقۋدان باس تارتقان ەمەس. ول ءۇشىن اۋديو باسىلىمدار، برايل حارىپتەرىمەن جازىلعان كىتاپتاردىڭ كومەگى تيگەن.
«سال اۋرۋىنا شالدىققان بالالاردى قوعامدا دۇرىس قابىلداماي جاتادى. كوپشىلىك ولاردىڭ اقىل-ەسىندە اۋىتقۋى بار دەپ ويلايدى. قوعامداعى ادامداردىڭ ءارتۇرلى پىكىرىن، ءارتۇرلى كوزقاراسىنا مەنىڭ اتا-انام توتەپ بەرە ءبىلدى. اۋىل كىتاپحاناشىسى ءتۇرلى مادەني شارانى ۇيىمداستىرىپ، وقىرمانداردى ىنتالاندىرىپ ءجۇر»،—دەيدى تۇلكىباس اۋدانىنىڭ تۇرعىنى.
مەيىرحان توپانباي كىتاپ وقىپ، ءتىل سىندىرۋمەن قاتار اۋدارما ىسىمەن دە اينالىسادى. وزگە ۇلتتىڭ شىعارمالارى مەن اقىن-جازۋشىلارىنىڭ ناقىل سوزدەرىن اۋدارادى. وتكەن جىلى «اقيقاتتان اتتامايىق!» اتتى العاشقى جيناعى جارىق كوردى. بيىل «جانىمنىڭ جاقۇتى» اتتى جيناعىن باسپاعا ازىرلەپ جاتىر.
