Túrkistan oblysynyń turǵyny Meıirhan Topanbaı 10 tilde erkin sóıleıdi. Ol múmkindigim shekteýli dep qarap otyrmaı, ýaqytyn til úırenýge jumsaǵan, dep habarlaıdy «Adyrna» tilshisi «Habar 24»-ke silteme jasap.
Týǵannan sal aýrýyna shaldyqqan jigerli jigit aýyl kitaphanasynda jumys isteıdi. 29 jastaǵy Meıirhan Topanbaı orta mektepti úzdik oqyp, eki birdeı mamandyqty meńgergen. Til úırenip, ózge ulttyń shyǵarmalarymen tanysýǵa bala kezden qumar bolypty. Búginde túrik, parsy, nemis, grek, ıspan tilderimen qatar armıan, polıak, tájik, franýz tilderin jetik biledi. Sondaı-aq óz betinshe aǵylshyn sabyǵyn oqyp, til syndyryp júr.
«Túrik tili, grek tilin men bala kezimnen úırendim. Odan keıin mektepke barǵannan keıin nemis tilin úırendim, franýz tilin úırendim. Sonymen alty til boldy ma? Sodan soń ýnıversıtetke barǵanda parsy jáne tájik tilin úırendim. Odan soń polıak pen bolgar tili bar ǵoı, sol eki tildi ıgerdim. Sodan soń ıspan tili, qazir mini ıtalıan tilin úıretip jatyrmyn. Múgedek bolsam da, masyl bolǵym kelmeıdi»,- deıdi izdenimpaz jigit.
Meıirhan Topanbaı bir kóziniń kórmeıtinine qaramastan, kitap oqýdan bas tartqan emes. Ol úshin aýdıo basylymdar, braıl haripterimen jazylǵan kitaptardyń kómegi tıgen.
«Sal aýrýyna shaldyqqan balalardy qoǵamda durys qabyldamaı jatady. Kópshilik olardyń aqyl-esinde aýytqýy bar dep oılaıdy. Qoǵamdaǵy adamdardyń ártúrli pikirin, ártúrli kózqarasyna meniń ata-anam tótep bere bildi. Aýyl kitaphanashysy túrli mádenı sharany uıymdastyryp, oqyrmandardy yntalandyryp júr»,—deıdi Túlkibas aýdanynyń turǵyny.
Meıirhan Topanbaı kitap oqyp, til syndyrýmen qatar aýdarma isimen de aınalysady. Ózge ulttyń shyǵarmalary men aqyn-jazýshylarynyń naqyl sózderin aýdarady. Ótken jyly «Aqıqattan attamaıyq!» atty alǵashqy jınaǵy jaryq kórdi. Bıyl «Janymnyń jaquty» atty jınaǵyn baspaǵa ázirlep jatyr.
