بەلگىلى ءانشى نۇرلان البان ءماجىلىس سايلاۋىنا ۇمىتكەر رەتىندە تىركەلگەنىن حابارلادى، دەپ جازادى “ادىرنا” ۇلتتىق پورتالى.
“قۇدايدىڭ قالاۋىمەن نيەت ەتىپ، ۇلكەن ىسكە قادام جاسادىم. بۇل اقپاراتتى ەستىگەندە ءبىرىڭىز كۇيىنەرسىز، ءبىرىڭىز سۇيىنەرسىز. ەندى ءبىرىڭىز ماقتارسىز، ءبىرىڭىز داتتارسىز. بۇل قادامدى جاساماس بۇرىن كوپ ويلاندىم. مەنى جاقسى كورەتىن ەل-جۇرتتىڭ، دوس-جاران، اعايىن-باۋىرلاردىڭ ۇسىنىسىمەن الدا كەلە جاتقان ۇلكەن ناۋقان، سايلاۋعا مەن دە قاتىسىپ، بايگەدە باعىمدى سىناسام دەپ شەشتىم. كۇنى كەشە الماتى وبلىسىنا قاراستى سايلاۋ وكرۋگىنە بەرىلگەن تالاپ-تىلەكتەرىم ەسكەرىلدى. مىنەكەي، بۇگىن قولىما ءبىرمانداتتى جۇيە بويىنشا وزىمدى-ءوزىم ۇسىنىپ، قر پارلامەنت ءماجىلىسى دەپۋتاتىنا كانديدات دەگەن كۋالىك بەرىلدى”، – دەدى نۇرلان البان.
ونەر يەسىنىڭ ايتۋىنشا، ول ەشقانداي پارتياعا مۇشە ەمەس.
“مەن ەشقانداي پارتيادا جوقپىن. جالعىز ىلىكتى ادامعا بۇل جاۋاپكەرشىلىكتىڭ جوعارى ەكەنىن، قانشالىقتى قيىن ەكەنىن، قارجىلاي جاعىنان دا وڭاي سوقپاسىن بىلەمىن. نە بولسا دا، وسىعان قاتىسۋعا بەل شەشتىم. ارينە باي-باعلاننىڭ بالاسى ەمەسپىن، اسىپ-تاسقان باي ەمەسپىن. مەنى جاقسى كورەتىن داۋلەتتى اعا-اپالارىم كومەك، قولداۋ كورسەتەمىن دەسە، قارسى ەمەسپىن. ەڭ باستىسى، تىلەكشى بولىڭىز”، – دەپ مالىمدەدى نۇرلان البان ءوزىنىڭ Instagram پاراقشاسىندا.
“ادىرنا” ۇلتتىق پورتالى
