قازاق سپورت جانە تۋريزم اكادەمياسىنىڭ رەكتورى قىسقى ۋنيۆەرسيادادا التىننان القا تاققان دانيل ۆاسيلەۆكە ءبىلىم گرانتىن تاپسىردى، دەپ جازادى “ادىرنا” ۇلتتىق پورتالى.
شاڭعىمەن تۇعىردان سەكىرۋشى دانيل ۆاسيلەۆ ورتاشا تارمپليندە ەڭ ۇزدىك ناتيجە كورسەتىپ، قىسقى ۋنيۆەرسيادا ويىندارىنىڭ جەڭىمپازى اتاندى. دانيل - قازاق سپورت جانە تۋريزم اكادەمياسىنىڭ وليمپيادالىق سپورت فاكۋلتەتىنىڭ 1-كۋرس ستۋدەنتى. اقش-تىڭ لەيك-پلەسيد قالاسىندا وتكەن ءدۇبىرلى دودادا ەل نامىسىن قورعاعان ستۋدەنت-سپورتشى دانيل ۆاسيلەۆكە ۇلكەن سپورتتاعى ۇزدىك جەتىستىگى ءۇشىن قازاق سپورت جانە تۋريزم اكادەمياسىنىڭ رەكتورى باۋىرجان زاكيريانوۆ ءبىلىم گرانتىن تاپسىردى.
دانيل سپورتپەن 8 جاسىنان شۇعىلدانىپ كەلەدى. كىشكەنتايىنان بار ارمانى – الەمدىك جارىستاردا توپ جارۋ. «بۇل جەتىستىكپەن توقتاپ قالمايمىن. الدا قىسقى وليمپيادا شىڭىن باعىندىرىپ، ەلىمنىڭ داڭقىن كوتەرۋ» دەيدى چەمپيون دانيل.
سونداي-اق 2023 جىلعى دۇنيەجۇزىلىك ۋنيۆەرسيادا جۇلدەگەر قاتارىنان كورىنبەسە دە, تاماشا ناتيجە كورسەتىپ، 4-5 ورىننان كورىنگەن ستۋدەنت-سپورتشىلار م.امانگەلدىۇلى، ا.ءالي، ا.كريۋكوۆا، ۆ.شيشكيناعا قازاق سپورت جانە تۋريزم اكادەمياسى 2022-2023 جىلعى وقۋ اقىلارىنا 100 پايىزدىق جەڭىلدىك سەرتيفيكاتىن تابىس ەتتى.
ايتا كەتەيىك، 2023 جىلعى بۇكىلالەمدىك ۋنيۆەرسيادادا قازاقستاندىق ستۋدەنت-سپورتشىلار 3 التىن، 4 كۇمىس جانە 4 قولا مەدالمەن 11 ورىنعا تۇراقتادى. بۇل – جوعارى كورسەتكىش. قورجىنعا تۇسكەن ءۇش التتىنىڭ ەكەۋى – قازاق سپورت جانە تۋريزم اكادەمياسىنىڭ ستۋدەنت-سپورتشىلارىنا تيەسىلى. (بياتلون جارىسى بويىنشا 15 شاقىرىم قاشىقتىقتا جەكەلەي سىنعا تۇسكەن قازاق سپورت جانە تۋريزم اكادەمياسىنىڭ 2 كۋرس ستۋدەنتى ۆاديم كۋرالەس التىننان القا تاقتى. )
“ادىرنا” ۇلتتىق پورتالى
