Qazaq sport jáne týrızm akademııasynyń rektory qysqy Ýnıversıadada altynnan alqa taqqan Danıl Vasılevke bilim grantyn tapsyrdy, dep jazady “Adyrna” ulttyq portaly.
Shańǵymen tuǵyrdan sekirýshi Danıl Vasılev ortasha tarmplınde eń úzdik nátıje kórsetip, qysqy Ýnıversıada Oıyndarynyń jeńimpazy atandy. Danıl - Qazaq sport jáne týrızm akademııasynyń Olımpıadalyq sport fakýltetiniń 1-kýrs stýdenti. AQSh-tyń Leık-Plesıd qalasynda ótken dúbirli dodada el namysyn qorǵaǵan stýdent-sportshy Danıl Vasılevke úlken sporttaǵy úzdik jetistigi úshin Qazaq sport jáne týrızm akademııasynyń rektory Baýyrjan Zakırıanov bilim grantyn tapsyrdy.
Danıl sportpen 8 jasynan shuǵyldanyp keledi. Kishkentaıynan bar armany – álemdik jarystarda top jarý. «Bul jetistikpen toqtap qalmaımyn. Alda qysqy Olımpıada shyńyn baǵyndyryp, elimniń dańqyn kóterý» deıdi chempıon Danıl.
Sondaı-aq 2023 jylǵy Dúnıejúzilik Ýnıversıada júldeger qatarynan kórinbese de, tamasha nátıje kórsetip, 4-5 orynnan kóringen stýdent-sportshylar M.Amangeldiuly, A.Álı, A.Krıýkova, V.Shıshkınaǵa Qazaq sport jáne týrızm akademııasy 2022-2023 jylǵy oqý aqylaryna 100 paıyzdyq jeńildik sertıfıkatyn tabys etti.
Aıta keteıik, 2023 jylǵy Búkilálemdik Ýnıversıadada qazaqstandyq stýdent-sportshylar 3 altyn, 4 kúmis jáne 4 qola medalmen 11 orynǵa turaqtady. Bul – joǵary kórsetkish. Qorjynǵa túsken úsh alttynyń ekeýi – Qazaq sport jáne týrızm akademııasynyń stýdent-sportshylaryna tıesili. (Bıatlon jarysy boıynsha 15 shaqyrym qashyqtyqta jekeleı synǵa túsken Qazaq sport jáne týrızm akademııasynyń 2 kýrs stýdenti Vadım Kýrales altynnan alqa taqty. )
“Adyrna” ulttyq portaly
