اكتريسا قازا تاپقان جول اپاتى. قىلمىستىق ءىس نەگە بۇرمالانۋدا؟

2496
Adyrna.kz Telegram

الماتىدا اكتريسا قازا تاپقان جول اپاتىنا قاتىستى جاڭا دەرەك شىقتى. بۇل تۋرالى قازا تاپقانداردىڭ ءبىرىنىڭ اپكەسى ايتىپ بەردى.  جول اپاتىنان قازا تاپقان دينارا حاميتوۆانىڭ اپكەسى ايدانا شاياحمەتوۆا تاياۋدا زارداپ شەككەن تاراپقا سوتقا جولدانعان ماتەريالداردىڭ كوشىرمەسى بەرىلگەنىن ايتادى.

الايدا كەيبىر پۋنكتەر ونىڭ نارازىلىعىن تۋدىرىپ وتىر.

ايتا كەتەيىك، وسى ءىس بويىنشا سوت الدىندا 34 جاستاعى ءىلياس كار جاۋاپ بەرىپ جاتىر.

"ساراپتاما جۇرگىزۋشىنىڭ قانىندا الكوگولدىڭ بولعانىن راستامادى. قان 2018 جىلدىڭ 30 جەلتوقسانىندا الىنعان، بىراق زەرتحاناعا 2019 جىلدىڭ 4 قاڭتارىندا عانا جولدانعان. ال ساراپتاما ناتيجەسى 11 قاڭتاردا شىققان. ياعني ساراپتامانى 10 كۇننەن اسا ۋاقىت جۇرگىزگەن. سونداي-اق، ناركولوگيالىق ساراپتاما الۋدىڭ مۇمكىن بولماعانى ايتىلادى. ايتۋلارىنشا، زەرتتەۋ جۇرگىزۋگە قان جەتكىلىكتى بولماعان. سوندا تاجىريبەسى بار ادام نەگە سونشا از قان العان جانە زەرتحانا ماماندارى نەلىكتەن قاننىڭ از ەكەنىن بىردەن ايتپاعان؟ مۇنداي ساراپتامانى ءبىرىنشى رەت جۇرىگىزىپ وتىر ما؟", - دەيدى ايدانا شاياحمەتوۆا.

 

الايدا مۇنىڭ الدىندا پوليتسەيلەر جۇرگىزۋشىنىڭ ماس بولعانىن راستاعان ەدى. "جۇرگىزۋشى (Gelandewagen - اۆتور.) قايعىلى جاعداي الدىندا Grand Opera تۇنگى كلۋبىندا بولىپ، ول جاقتان ماس كۇيدە شىققان", - دەگەن ەدى الماتى قالالىق پوليتسيا دەپارتامەنتى باسشىسىنىڭ ورىنباسارى ءىزباسار بەكتۇروۆ. مۇنى ول 11 قاڭتاردا راستاعان بولاتىن. سونداي-اق، پوليتسەيلەر باستاپقىدا جول اپاتىنان كەيىن Gelandewagen جۇرگىزۋشىسىنىڭ ۇستالىپ، ۋاقىتشا ۇستاۋ يزولياتورىنا قامالعانىن ايتقان ەدى.

"الايدا، قۇجاتتارعا سايكەس، ول پوليتسياعا ءوزى بارىپتى. بۇل ۇكىم شىعاراردا اسەر ەتپەي مە", -دەيدى ايدانا شاياحمەتوۆا.

الماتى قالالىق پروكۋراتۋرا وكىلدەرىنىڭ مالىمەتىنشە، ءىلياس كار جول ەرەجەسىن بۇزىپ، ابايسىزدا ءۇش ادامنىڭ ولىمىنە اكەلگەن جول اپاتىن جاساپ، جول-كولiك وقيعاسى بولعان جەردەن كەتىپ قالدى دەپ ايىپتالىپ جاتىر (قر قىلمىستىق كودەكسىنىڭ 345-بابىنىڭ 4-بولىگى مەن 347-باپ).

الايدا، شاياحمەتوۆانىڭ ايتۋىنشا، تەرگەۋشى ءىس-ماتەريالىنا ءىلياس كاردىڭ قر قىلمىستىق كودەكسىنىڭ 119-بابىنا سايكەس ("قاۋiپتi جاعدايدا قالدىرۋ" ايىپتى دەپ تانىلاتىنىن قوسپاعان.

"جوعارىدا ايتىلعانداردىڭ بارلىعىنان تەرگەۋ ءادىل ەمەس ءجۇرىپ جاتىر دەگەن وي كەلەدى. وسىدان كەيىن ءىستىڭ "ەرەكشە باقىلاۋعا" الىنۋى ماسەلەسى قالاي ءجۇرىپ جاتىر دەگەن سۇراق تۋىنداماي ما؟", - دەيدى ايدانا شاياحمەتوۆا.

 

ەسكە سالايىق، 29 جەلتوقساندا بولعان بۇل جول اپاتىنان اكتريسا شولپان ەلگەزەكوۆا مەن ونىڭ قۇربىسى دينارا جانە جەڭىل كولىك جۇرگىزۋشىسى قازا تاپقان ەدى. وقيعا بولعان كۇننىڭ ەرتەسى جول-كولىك وقيعاسىنىڭ بەينەباقىلاۋ كامەراسىنا ءتۇسىپ قالعان ۆيدەوسى پايدا بولدى. ۆيدەو كادرلارىنا قاراعاندا، Mitsubishi Galant باعدارشامنىڭ جاسىل ءتۇسى جانعاندا سەيفۋللين بويىمەن قوزعالىستى باستاعان، وسى ساتتە ابايدىڭ بويىمەن اسقان جىلدامدىقپەن كەلە جاتقان Mercedes Gelandewagen ونى سوعىپ وتكەن. جەڭىل كولىك سوققىدان بىرنەشە مەترگە دەيىن ۇشىپ كەتكەن.  Mercedes Gelandewagen جۇرگىزۋشىسى وقيعا بولعان جەردەن قاشىپ كەتكەن. الايدا كەشە، 30 جەلتوقساندا ونى پوليتسەيلەر ۇستاعان. كەيىن ونىڭ ماس بولعانى انىقتالدى. ارتىنشا جۇرگىزۋشىنىڭ ەكى ايعا قامالعانى حابارلاندى. وقيعا بولعان كۇننىڭ ەرتەسى جول-كولىك وقيعاسىنىڭ بەينەباقىلاۋ كامەراسىنا ءتۇسىپ قالعان ۆيدەوسى تارالعان ەدى.

پىكىرلەر