زاڭگەر باقىتجان بازاربەك “AMANAT” پارتياسىنىڭ اتىنان سايلاۋعا تۇسۋگە دايىن ەكەنىن ايتتى. بۇل تۋرالى ول جۋرناليست امان تاسىعاننىڭ “Talk Like” باعدارلاماسىنا بەرگەن سۇحباتىندا ايتتى، دەپ حابارلايدى “ادىرنا” ۇلتتىق پورتالى.
زاڭگەر ءجۋرناليستىڭ “ەگەر سىزگە پارتيانىڭ اتىنان دەپۋتات بولۋعا ۇسىنىس تۇسسە، كەلىسەسىز بە؟” دەگەن ساۋالىنا، بىردەن دايىن ەكەنىن مالىمدەدى.
“ەگەر ۇسىنىس بولسا، مەن سايلاۋعا تۇسۋگە دايىنمىن. ەڭ باستىسى - حالىق. ءبىرىنشى، حالىقتىڭ سەنىمى، سوسىن “AMANAT” پارتياسىنىڭ سەنىمى”،- دەدى باقىتجان بازاربەك.
بۇرىن ادىلەت پارتياسىنىڭ اتىنان سايلاۋعا ءتۇسىپ، وتپەي قالعان زاڭگەر، وسى جولى دا وتپەي قالامىن دەپ قورىقپاي ما؟
“حالىققا قانداي پارلامەنت كەرەك؟ ەگەر بۇرىنعى حالىقتى سورلاتىپ جۇرگەن پارلامەنت بولسا، وندا انا ىعاي مەن سىعايدى سايلاڭىزدار، انا سەكسەنباي مەن توقسانبايدىڭ بالاسىن سايلاڭىزدار، ءبىز ەندى شەتتە قالامىز. حالىققا قانداي پارلامەنت كەرەك، سوعان بايلانىستى. حالىق وزىنە كەرەگىن تاڭدايدى”،- دەپ جاۋاپ بەردى زاڭگەر.
سونداي-اق، ول پارتياعا مۇشە بولۋىنا نە تۇرتكى بولعانىن دا ايتا كەتتى.
“شىندىعىن ايتايىق، وسى ۋاقىتقا دەيىن جەر سالاسىنداعى زاڭسىزدىقپەن كۇرەسىپ كەلگەن زاڭگەرمىن. وعان «Nur Otan»-نىڭ قاتىسى دا بار. بىراق ول پارتياعا كىرەتىن ەشقانداي ماقساتىم بولعان جوق. بارلىق جامان ويدىڭ بارلىعى «Nur Otan»-عا كەلەدى. حالىق قاي جەرگە بارسا دا، كىم جامان؟ ءبىرىنشى، اكىم، ەكىنشى، پروكۋرور، ءۇشىنشى، «Nur Otan» جامان. بىراق «Nur Otan» با اكىمنىڭ قاۋلىسىن شىعارعان؟ ءسويتىپ، زاڭسىز ۇلەسكەرلەردىڭ يەگەرلىگىنە وتكىزىپ جىبەرگەن «Nur Otan» با؟ جوق، ول - اكىم. ال ول اكىمنىڭ ۇستىنەن قىلمىستىق جاۋاپكەرشىلىككە تارتپاعان «Nur Otan» با؟ جوق، پروكۋراتۋرا جانە قۇقىق قورعاۋ ورگاندارى. بىراق كىردىڭ بارلىعى «Nur Otan»-عا كەلدى. سونى ەسەپتەي وتىرىپ، مەن ءوزىم ساياسي بولاشاعىمدى جوسپارلاپ قويعانمىن. ەش ۋاقىتتا مەن «Nur Otan» پارتياسىنا كىرمەيمىن دەپ.
ەندى قاڭتار وقيعاسىنان كەيىن «Nur Otan»-نىڭ اتاۋى اۋىستى. ماعان “AMANAT” پارتياسىنىڭ باسشىلارى شىعىپ، ءبىزدىڭ ءبىر عانا اتاۋىمىز اۋىسقان جوق، ءبىزدىڭ ءتانىمىز دە اۋىستى، ويىمىز دا اۋىستى دەگەننەن كەيىن، مەن زەرتتەدىم…
مەن “AMANAT” پارتياسىنىڭ باسشىلارىنا شارت قويدىم: مەنى كوميسسيانىڭ توراعاسىنىڭ ورىنباسارى ەتىپ قويدىڭىزدار. مەن ەشقانداي اۆتوريتەتكە قارامايمىن، ءبارىن تەكسەرەمىن دەدىم. ياعني، “AMANAT” پارتياسى ماعان ەركىندىك بەردى. جەر سالاسىنداعى زاڭسىز جەرلەردى مەملەكەت مەنشىگىنە قايتارۋعا ەركىندىك بەردى”،- دەدى باقىتجان بازاربەك.
