ءبىز، ياعني، قازاقشا وسكەن قازاقتار، ءوزىمىزدى ەكىنشى سورت سەزىنەمىز. 99%-ىمىز سوندايمىز. ونى ايتپاساق تا، اتتاپ باسقان سايىن ىسىمىزبەن، سوزىمىزبەن كورسەتىپ قويامىز. مىسالى...
ەگەر سەن بانكوماتقا بارعاندا ورىس ءتىلىن تاڭداساڭ;
ەگەر سەن ءبىر مەكەمەگە بارعاندا، قوڭىراۋ شالعاندا الدىمەن ورىسشا سويلەسەڭ;
ەگەر سەن ايگەرىمدى ايگەرا، اينۇردى اينۋرا دەسەڭ (ويتكەنى ورىستاردىڭ اتتارى ناتاشا، لەنا، ساشا، كسيۋشا عوي), اتا دەگەندى اتاشكا (دەدۋشكا), اجە دەگەندى اجەكا (بابۋشكا), اپا/اپكە-سىڭىلى/قارىنداس دەگەندى سەسترا دەيتىن بولساڭ;
ەگەر سەن بالاڭا ات قويعاندا ءا، ءى، ڭ، ع، ءۇ، ۇ، ق، ءو، ھ دەگەن ارىپتەرى جوق اتتاردى تاڭداۋعا تىرىسساڭ;
ەگەر سەن ينستاگرامداعى ءوزىڭ تۋرالى اقپاراتتى ورىسشا جازىپ قوياتىن بولساڭ;
ەگەر سەن بىرنارسە ساتاتىن كەزدە ماركەت پلەيستەرگە، ۋاتساپ توپتارعا، ءارتۇرلى قولدانبالارعا جارناما بەرگەندە ونى ورىسشا جازساڭ;
ەگەر سەن ورىسشا سويلەگەن اداممەن سىپايى سويلەسىپ، قازاقشا سويلەگەن ادامداردى باسىنا سويلەيتىن بولساڭ;
ەگەر سەن قازاقشا كىتاپ وقىماساڭ، يۋتيۋبتان قازاقشا ۆيدەولاردى اشپايتىن بولساڭ، قازاقشا شىققان كينولاردى مەنسىنبەسەڭ، تەك ورىسشا نە اعىلشىنشا كونتەنتتى عانا قىزىقتاساڭ;
ەگەر سەن بالاڭدى ورىس سىنىبىنا بەرسەڭ;
بالاڭ قازاقشا بىلمەسە جانە سونى ماقتان كورسەڭ
وندا سەن ەكىنشى سورتسىڭ جانە سوعان كوندىككەن ادامسىڭ.
اۋرۋدى ەمدەۋ ءۇشىن مويىنداۋ كەرەك. ەگەر ەكىنشى سورت ەكەنىڭ راس بولسا، وندا سونى مويىندا دا، جوعارىداعى ادەتتەرىڭنەن قۇتىلىپ، كەرىسىنشە ىستە.
قازاق بولۋ دەگەن باسقالاردى جەك كورۋ ەمەس، ءوزىڭنىڭ تابيعاتىڭا ساي بولۋ دەگەن ءسوز. ءوز-ءوزىڭدى قور سەزىنبە، باسىڭدى كوتەرىپ ءجۇر، ءبىر-ءبىرىڭدى قولدا، بەلسەندى بول. مىنا ەل بىزدىكى. ءبىز قازاقشا سويلەسىپ، قازاقشا ءومىر سۇرەتىن باقىتتى ەلگە اينالۋىمىز كەرەك.
ارمان المەنبەت
