2023 جىلدىڭ 3 اقپان كۇنى استانا قالاسى ب.مايلين اتىنداعى №52 مەكتەپ-گيمنازياسىندا «پاراساتتى وتباسى» اتتى مۇقاعالي ماقاتاەۆتىڭ تۋعان كۇنىنە وراي ۇيىمداستىرىلعان جىر كەشى ءوتتى.
جىر كەشىنە وقۋشى، اتا-انا، مۇعالىم قاتىستى. بۇل — "ۇشتىك وداقتىڭ" بىرلەسكەن جۇمىسى. ساحناعا ءۇش ادام (اكەسى، اناسى، بالاسى) شىعىپ، الدىمەن اقيىق اقىننىڭ جىر شۋماقتارى مەن ولەڭدەرىن ناقىشىنا كەلتىرىپ ورىنداپ، كورەرمەندەردى ءدان ريزا ەتتى. ودان كەيىن وقۋشى بالاسى “ساتىلاي كەشەندى وقىتۋ" تەحنولوگياسى بويىنشا قازاق ءتىلى مەن ادەبيەتى پانىنەن العان ءبىلىمىن ورتاعا سالدى، ولەڭدەگى نەگىزگى ءسوزدىڭ بىرىنە دىبىستىق تالداۋ جاسادى. ال سودان سوڭ اتا-انا مەن بالاسى قوسىلىپ، مۇزبالاق اقىن مۇقاعاليدىڭ سوزىنە جازىلعان اسەم ءاننىڭ ءبىرىن ورىندادى. “ناۋرىز ايى تۋعاندا”، “سەنىڭ كوزىڭ”، “ەسىڭە مەنى العايسىڭ”، “باقىت دەگەن” جانە تاعى باسقا تاماشا اندەر شىرقالدى.
وسىلايشا رۋحتى جىرلارمەن تاربيە، دىبىستىق تالداۋمەن ءبىلىم، اۋەزدى اۋەنمەن ونەر پاش ەتىلدى.
1-سىنىپتان 4-سىنىپقا دەيىنگى جالپى سانى 9 كوماندا قاتىسىپ، زور دايىندىعىمەن، ۇلتتىق ناقىشتاعى ادەمى كيىمدەرىمەن ءتانتى ەتتى. اسىرەسە ادەتتە ۋاقىت تابا بەرمەيتىن اكەلەردىڭ بەلسەندىلىگى ەرەكشە اڭعارىلدى.
جينالعان قوناقتار ەستى دە ەسكى اندەرگە قوسىلىپ شىرقاپ، اقىننىڭ پاتريوتتىق، ليريكالىق ولەڭدەرىن تىڭداپ رۋحتانىپ، تاقىلداعان بالالاردىڭ بىلىمىنە ريزا بولىپ وتىردى. كەش سوڭىندا ءسوز العان مەكتەپ ديرەكتورى بەكجانوۆا ءجاۋدىر باحتيارقىزى بۇل يگىلىكتى ءىستىڭ ودان دا ءارى جالعاسىن تاباتىنىن ايتىپ، قاتىسۋشىلاردى ماراپاتتادى.
ال “ساتىلاي كەشەندى وقىتۋ” تەحنولوگياسىنىڭ اۆتورى، پەداگوگيكا عىلىمدارىنىڭ دوكتورى ورازاحىنوۆا نۇرشا الجانبايقىزى جينالعان كوپشىلىككە العىسىن ايتىپ، الاش ارىستارىنىڭ ءىلىمى مەن يدەياسىنا سۇيەنگەن ادىستەمەنى قازاق شاكىرتتەرىنە ۇيرەتۋدەگى تاباندىلىعىنا ريزاشىلىعىن ءبىلدىردى.
"ادىرنا" ۇلتتىق پورتالى
