تۇركىستان وبلىسىندا بىرنەشە ايدان بەرى جۇرگىزىلگەن اپاتتىڭ الدىن الۋ جۇمىستارىنىڭ ناتيجەسىندە تولاسسىز جاۋعان جاۋىننان كەلەر الاپات اپاتقا جول بەرىلگەن جوق. جاۋاپتى ورگان باسشىلارىنىڭ شتاب وتىرىسىندا ساراپشىلار وسىنداي قورىتىندىعا كەلدى. وبلىستىق توتەنشە جاعدايلار دەپارتامەنتىنىڭ باسشىلىعى شىعىن كولەمىن انىقتاۋ ءۇشىن كەنتاۋ مەن ساۋران اۋدانىندا جەرگىلىكتى دەڭگەيدەگى توتەنشە جاعداي جاريالاۋ تۋرالى ۇسىنىس كوتەردى.
جالپى، جىل باسىنان بەرى وبلىس اكىمى دارحان ساتىبالدىنىڭ تاپسىرماسىمەن بارلىق اۋدان، قالادا سۋ تاسقىنىنا قارسى جۇمىس كۇشەيتىلگەن بولاتىن. تۇراقتى تالقىلانىپ، ءاربىر اۋدان، قالا اكىمىنە ناقتى مىندەتتەر جۇكتەلدى. اۋا رايىنىڭ الدىن الا بولجامى نازارعا الىنىپ، قاۋىپسىزدىك نىعايىپ، ارىقتار مەن اتىزدار، كانالدار تازالاندى. تەحنيكا مەن توتەنشە جاعداي دەپارتامەنتىنىڭ ماماندارى، جەرگىلىكتى اكىمدىكتەر دايىندىققا كەلتىرىلدى. سونىڭ ارقاسىندا ۇلكەن شىعىندار مەن اپاتتارعا توسقاۋىل قويىلىپ وتىر.
وبلىس اكىمى دارحان ساتىبالدى ساۋران اۋدانى مەن كەنتاۋ قالاسىنداعى سۋ باسقان بىرنەشە ەلدى مەكەندى ارالاپ، تۇرعىندارمەن كەزدەستى. وراڭعاي، قۇسشى اتا اۋىلدارىن ارالادى. كوشەلەردەن سۋ قاشىرتۋ جۇمىستارىن كوردى. توتەنشە جاعداي دەپارتامەنتىنىڭ وكىلدەرىمەن بىرگە جەرگىلىكتى تۇرعىندارمەن جۇزدەستى.
– جاۋىن-شاشىننىڭ مولشەردەن تىس كوپ ءتۇسۋى، اۋا رايىنىڭ كۇرت جىلىنىپ، قاردىڭ ەرۋى وسى جاعدايعا اكەلدى. تۇرعىنداردىڭ قاۋىپسىزدىگى مەن اماندىعى ماڭىزدى. بۇل جاعدايدا سابىر كەرەك. ەڭ باستىسى، ەل امان. بارلىق اۋدان، قالاداعى جاعداي باقىلانىپ، ءتيىستى جۇمىستار اتقارىلىپ جاتىر. يرريگاتسيالىق جۇيەلەر اشىلىپ، كانالدار تازارتىلعان. جاعداي باقىلاۋدا، – دەدى دارحان ساتىبالدى.
قارناق اۋىلىندا قارعىن سۋدى بوگەپ، باعىتىن بۇرۋ جۇمىسى ءجۇرىپ جاتىر. تۇرعىندار وزدەرىنە ارنايى كەلىپ، جاعدايىن سۇراپ، ەلدىڭ اراسىنان تابىلعان وبلىس اكىمىنە ريزاشىلىقتارىن ءبىلدىرىپ، سۋ تاسقىنى زاردابىن جويۋ جۇمىستارى بويىنشا ۇسىنىستارىن جەتكىزدى.
دارحان ساتىبالدى ساۋران اۋدانىنداعى شاعا اۋىلىنداعى بىرنەشە اۋماقتى ارالاپ كوردى. جاۋىن-شاشىننىڭ توقتاۋىنا بايلانىستى سۋ دەڭگەيى تومەندەگەن. دەگەنمەن قاۋىپسىزدىك شارالارى كۇشەيتىلەدى.
جاۋىن-شاشىن كوپ تۇسۋىنە جانە قاردىڭ ەرۋىنە بايلانىستى بايدىبەك، ساۋران، ورداباسى اۋداندارىنداعى بىرنەشە اۋىلداعى ۇيلەردىڭ اۋلالارىن سۋ باستى. ەرىگەن قار سۋى مەن جاڭبىر سۋى 19 ەلدى مەكەندەگى كوشەلەر مەن اۋلا ۋچاسكەلەرى ارقىلى اعىپ ءوتتى. قازىرگى تاڭدا 21 كوشە، 234 اۋلا، 1 تۇرعىن جەكە ۇيگە سۋ كىرگەن. تجد كۇشىمەن سۋ باسقان اۋلا اۋماعىنان 200-دەن استام ادام ەۆاكۋاتسيالانعان. ول ادامدار تۋىستارىنىڭ ۇيلەرىنە جايعاستى. حالىقتى ەۆاكۋاتسيالاۋ جانە ۋاقىتشا ورنالاستىرۋ ءۇشىن ساۋران اۋدانىندا 4 ەۆاكۋاتسيالىق پۋنكت دايىندالدى. سۋ تاسقىنى سالدارىن جويۋعا بارلىعى 300-دەن استام ادام، 100-گە جۋىق تەحنيكا، 28 موتوپومپا جۇمىلدىرىلدى. سونىمەن بىرگە باسقارمالار مەن كاسىپكەرلەر ارقىلى ونداعان تەحنيكا كومەككە كەلىپ وتىر.
تۇركىستان وبلىسى توتەنشە جاعدايلار دەپارتامەنتىنىڭ باستىعى نۇرعالي ءجۇنىسوۆتىڭ ايتۋىنشا، جاڭا جىلدان بەرى سۋ تاسقىنىنىڭ الدىن الۋ باعىتىندا جۇيەلى جۇمىس جۇرگىزىلگەن. اكىمدىكتەر مەن دەپارتامەنتتىڭ بىرلەسكەن ءىس-ارەكەتى ارقىلى جاعداي باقىلاۋعا الىنىپ وتىر.
بۇگىندە تۇركىستان وبلىسىنىڭ سۋ باسۋ قاۋپى بار ايماقتارى مەن سۋ نىساندارىندا 24 ساعاتتىق كەزەكشىلىك ۇيىمداستىرىلعان. سۋدىڭ دەڭگەيى جانە ەلدى مەكەندەردى قارعىن سۋدان ساقتاۋ جۇمىستارى تۇراقتى قاداعالاۋعا الىنعان.
"ادىرنا" ۇلتتىق پورتالى
