Túrkistan oblysynda birneshe aıdan beri júrgizilgen apattyń aldyn alý jumystarynyń nátıjesinde tolassyz jaýǵan jaýynnan keler alapat apatqa jol berilgen joq. Jaýapty organ basshylarynyń shtab otyrysynda sarapshylar osyndaı qorytyndyǵa keldi. Oblystyq tótenshe jaǵdaılar departamentiniń basshylyǵy shyǵyn kólemin anyqtaý úshin Kentaý men Saýran aýdanynda jergilikti deńgeıdegi tótenshe jaǵdaı jarııalaý týraly usynys kóterdi.
Jalpy, jyl basynan beri oblys ákimi Darhan Satybaldynyń tapsyrmasymen barlyq aýdan, qalada sý tasqynyna qarsy jumys kúsheıtilgen bolatyn. Turaqty talqylanyp, árbir aýdan, qala ákimine naqty mindetter júkteldi. Aýa raıynyń aldyn ala boljamy nazarǵa alynyp, qaýipsizdik nyǵaıyp, aryqtar men atyzdar, kanaldar tazalandy. Tehnıka men tótenshe jaǵdaı departamentiniń mamandary, jergilikti ákimdikter daıyndyqqa keltirildi. Sonyń arqasynda úlken shyǵyndar men apattarǵa tosqaýyl qoıylyp otyr.
Oblys ákimi Darhan Satybaldy Saýran aýdany men Kentaý qalasyndaǵy sý basqan birneshe eldi mekendi aralap, turǵyndarmen kezdesti. Orańǵaı, Qusshy ata aýyldaryn aralady. Kóshelerden sý qashyrtý jumystaryn kórdi. Tótenshe jaǵdaı departamentiniń ókilderimen birge jergilikti turǵyndarmen júzdesti.
– Jaýyn-shashynnyń mólsherden tys kóp túsýi, aýa raıynyń kúrt jylynyp, qardyń erýi osy jaǵdaıǵa ákeldi. Turǵyndardyń qaýipsizdigi men amandyǵy mańyzdy. Bul jaǵdaıda sabyr kerek. Eń bastysy, el aman. Barlyq aýdan, qaladaǵy jaǵdaı baqylanyp, tıisti jumystar atqarylyp jatyr. Irrıgaııalyq júıeler ashylyp, kanaldar tazartylǵan. Jaǵdaı baqylaýda, – dedi Darhan Satybaldy.
Qarnaq aýylynda qarǵyn sýdy bógep, baǵytyn burý jumysy júrip jatyr. Turǵyndar ózderine arnaıy kelip, jaǵdaıyn surap, eldiń arasynan tabylǵan oblys ákimine rızashylyqtaryn bildirip, sý tasqyny zardabyn joıý jumystary boıynsha usynystaryn jetkizdi.
Darhan Satybaldy Saýran aýdanyndaǵy Shaǵa aýylyndaǵy birneshe aýmaqty aralap kórdi. Jaýyn-shashynnyń toqtaýyna baılanysty sý deńgeıi tómendegen. Degenmen qaýipsizdik sharalary kúsheıtiledi.
Jaýyn-shashyn kóp túsýine jáne qardyń erýine baılanysty Báıdibek, Saýran, Ordabasy aýdandaryndaǵy birneshe aýyldaǵy úılerdiń aýlalaryn sý basty. Erigen qar sýy men jańbyr sýy 19 eldi mekendegi kósheler men aýla ýchaskeleri arqyly aǵyp ótti. Qazirgi tańda 21 kóshe, 234 aýla, 1 turǵyn jeke úıge sý kirgen. TJD kúshimen sý basqan aýla aýmaǵynan 200-den astam adam evakýaııalanǵan. Ol adamdar týystarynyń úılerine jaıǵasty. Halyqty evakýaııalaý jáne ýaqytsha ornalastyrý úshin Saýran aýdanynda 4 evakýaııalyq pýnkt daıyndaldy. Sý tasqyny saldaryn joıýǵa barlyǵy 300-den astam adam, 100-ge jýyq tehnıka, 28 motopompa jumyldyryldy. Sonymen birge basqarmalar men kásipkerler arqyly ondaǵan tehnıka kómekke kelip otyr.
Túrkistan oblysy tótenshe jaǵdaılar departamentiniń bastyǵy Nurǵalı Júnisovtiń aıtýynsha, jańa jyldan beri sý tasqynynyń aldyn alý baǵytynda júıeli jumys júrgizilgen. Ákimdikter men departamenttiń birlesken is-áreketi arqyly jaǵdaı baqylaýǵa alynyp otyr.
Búginde Túrkistan oblysynyń sý basý qaýpi bar aımaqtary men sý nysandarynda 24 saǵattyq kezekshilik uıymdastyrylǵan. Sýdyń deńgeıi jáne eldi mekenderdi qarǵyn sýdan saqtaý jumystary turaqty qadaǵalaýǵa alynǵan.
"Adyrna" ulttyq portaly
