Respublica پارتياسىنىڭ توراعاسى ايداربەك حودجانازاروۆ كەزەكتەن تىس ءى سەزدى شاقىرۋ تۋرالى جارلىققا قول قويدى

2623
Adyrna.kz Telegram

Respublica پارتياسىنىڭ توراعاسى ايداربەك حودجانازاروۆ 6 اقپاندا استانادا وتەتىن كەزەكتەن تىس ءى سەزدى شاقىرۋ تۋرالى جارلىققا قول قويدى، دەپ جازادى "ادىرنا" ۇلتتىق پورتالى.

سەزد جۇمىسىنا ەلىمىزدىڭ بارلىق وڭىرىنەن پارتيا مۇشەلەرى قاتىسادى.  شارادا Respublica پارتياسىنىڭ سايلاۋالدى باعدارلاماسى، سونداي-اق جاڭارتىلعان جارعىسى تانىستىرىلىپ بەكىتىلەدى.  سونىمەن قاتار، پارتيالىق تىزىمدەر جانە ءبىر مانداتتى اۋماقتىق وكرۋگتەر بويىنشا ۇسىنىلعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتتىعىنا كانديداتتارعا داۋىس بەرۋ وتەدى.

«قازىر ورتالىق اپپارات پارتيانىڭ وڭىرلىك بولىمشەلەرىمەن بىرلەسىپ، Respublica تاريحىنداعى ماڭىزدى پارتياىشىلىك ءىس-شارالاردىڭ ءبىرى – كەزەكتەن تىس ءبىرىنشى سەزگە اۋقىمدى دايىندىق جۇمىستارىن جۇرگىزۋدە.  بارلىق پارتيا مۇشەلەرى سەزدى تاعاتسىزدانا كۇتۋدە، ويتكەنى بۇل شارا ءبىز ءۇشىن تۇعىرناما بولادى، جيىن بارىسىندا ءبىز ءوزىمىزدىڭ نەگىزگى يدەيالارىمىز بەن ۇسىنىستارىمىزدى جەتكىزەتىن بولامىز»، - دەپ اتاپ ءوتتى ايداربەك حودجانازاروۆ.

سەزد بەيرەسمي تۇردە، «گالستۋكسىز» فورماتتا وتەدى.  شاراعا بەلگىلى قازاقستاندىق كاسىپكەرلەر مەن قوعام قايراتكەرلەرى  قاتىسادى.  Respublica پارتياسىنىڭ توراعاسى، اۋىل شارۋاشىلىعى تاۋارىن ءوندىرۋشى، «ولجا اگرو» سەرىكتەستىگىنىڭ باسشىسى ايداربەك حودجانازاروۆ، تەڭ توراعالار مەن كاسىپكەرلەر – سىرىمبەك تاۋ، رۋسلان بەردەنوۆ، ماكسيم بارىشەۆ، دينارا شۇكىجانوۆا، قۋانىش شونباي، بەيبىت الىبەكوۆ جانە نۇرلان قويانباەۆ قاتىسىپ، ءسوز سويلەيدى.

پارتيا تۋرالى

Respublica – مەملەكەت قىزمەتىنىڭ ءتۇرلى سالالارىن قالپىنا كەلتىرۋگە ۇمتىلاتىن بەلسەندى ازاماتتاردى بىرىكتىرەتىن جاڭا پارتيا. وعان قازاقستاندىق كاسىپكەرلەر مەن قوعام قايراتكەرلەرى تارتىلعان. اۋىل شارۋاشىلىعى تاۋارىن ءوندىرۋشى، «ولجا اگرو» سەرىكتەستىگىنىڭ باسشىسى ايداربەك حودجانازاروۆ پارتيا توراعاسى بولدى. تەڭتوراعالار قاتارىندا كاسىپكەرلەر – سىرىمبەك تاۋ، رۋسلان بەردەنوۆ، ماكسيم بارىشەۆ، دينارا شۇكىجانوۆا، قۋانىش شونباي، بەيبىت الىبەكوۆ جانە نۇرلان قويانباەۆتار بار.

پارتيانىڭ باستى ماقساتى – ءاربىر قازاقستاندىق ساياسي، الەۋمەتتىك جانە ەكونوميكالىق وزگەرىستەرگە ءوزىنىڭ اتسالىسىپ جاتقانىن سەزىنۋى ءۇشىن ەل ساياساتىنا ىقپال ەتۋ تەتىكتەرىن جاساۋ.

Respublica پارتياسىنىڭ ۇرانى – «جاڭا ادامدار – جاڭا قادامدار».

پارتيانىڭ قۇرىلعانى تۋرالى 2022 جىلدىڭ تامىزىندا جاريالاندى. 2023 جىلدىڭ 18 قاڭتارىندا Respublica پارتياسى تىركەۋ قۇجاتتارىن قابىلدادى.

سايلاۋ-2023

ءماجىلىس پەن ءماسليحاتتاردىڭ مەرزىمىنەن بۇرىن سايلاۋى جاڭا ەرەجە بويىنشا وتەدى. يننوۆاتسيالار بيلىكتىڭ وكىلەتتى تارماعىن نەعۇرلىم باسەكەگە قابىلەتتى جانە ءادىل قالىپتاستىرۋعا باعىتتالعان، كەڭىرەك كوزقاراستار پاليتراسىن قامتاماسىز ەتەدى، سونىمەن قاتار ساياسي جاڭعىرتۋ اياسىنداعى رەفورمالاردىڭ جالعاسى بولىپ تابىلادى.

باستى جاڭالىق – ارالاس پروپورتسيونالدى-ماجوريتارلىق سايلاۋ جۇيەسىنە كوشۋ. سونىمەن قاتار، ەندى ءماجىلىس دەپۋتاتتارىنىڭ 70 پايىزى پارتيالىق ءتىزىم بويىنشا، 30 پايىزى ءبىر مانداتتى وكرۋگتەر بويىنشا سايلانادى. ارالاس سايلاۋ جۇيەسى بويىنشا 50-دە 50 قاتىناسى نەگىزىندە وبلىستار مەن رەسپۋبليكالىق ماڭىزى بار قالالاردىڭ ءماسليحاتتارىنا دا سايلاۋ وتەدى. ال اۋداندار مەن وبلىستىق ماڭىزى بار قالالاردىڭ ءماسليحاتتارىنا سايلاۋدا ازاماتتار ءبىر مانداتتى وكرۋگتەردەگى كانديداتتارعا عانا داۋىس بەرەدى.

سونداي-اق، پارتيالاردىڭ ماجىلىسكە ءوتۋ شەگى 5 پايىزعا دەيىن تومەندەتىلىپ، ولاردى تىركەۋ ءتارتىبى جەڭىلدەتىلدى.

"ادىرنا" ۇلتتىق پورتالى 

 

پىكىرلەر