سيريا، يراك جانە اۋعانستانداعى قاقتىعىس ايماقتارىندا شامامەن 250 قازاقستان ازاماتشالارى ءجۇر.
بۇل تۋرالى ۇقك توراعاسىنىڭ ورىنباسارى نۇرعالي بىلىسبەكوۆ كوميتەتتىڭ وتىرىسى بارىسىندا ايتتى.
"كەتىپ جاتقانداردىڭ باسىم بولىگى ايەلدەر، ارينە، ولار كۇيەۋلەرىنىڭ سوڭىنان كەتەدى. قازاقستان اۋماعىندا وسى ءۇشىن قىلمىستىق جاۋاپكەرشىلىككە تارتىلعاندار بار. قاقتىعىس بولىپ جاتقان ايماقتاردا قازاقستاندىق ايەلدەردىڭ جۇرگەنى جايلى مالىمەتتەر بار. ءبىز ولاردىڭ ارەكەتتەرىنە قىلمىستىق قۇقىق تۇرعىسىنان باعا بەرەمىز. ەلىمىزگە ورالعان جاعدايدا ولار قىلمىستىق جاۋاپكەرشىلىككە تارتىلادى", - دەدى بىلىسبەكوۆ.
جاقىندا پرەزيدەنت نۇرسۇلتان نازارباەۆ قازاقستان ازاماتتارىن سيريادان ەۆاكۋاتسيالاۋ جونىندەگى گۋمانيتارلىق شارانىڭ اياقتالۋىنا بايلانىستى ۇندەۋ جاساعان بولاتىن. "بيىلعى 6 قاڭتاردا مەنىڭ تاپسىرمام بويىنشا قۇقىق قورعاۋ ورگاندارى مەن سىرتقى ىستەر مينيسترلىگى جۇرگىزگەن گۋمانيتارلىق شارا ناتيجەسىندە سيريادان 47 ازاماتىمىز، سونىڭ ىشىندە 30 بالا ەلىمىزگە قايتارىلدى. ولار داعدارىس جايلاعان ەلگە الدانىپ بارىپ، تەرروريستەردىڭ تۇتقىنىندا بولدى. قازاقستانعا كەلگەن سوڭ ايەلدەر مەن بالالارعا مەملەكەت تاراپىنان بارلىق كومەك كورسەتىلدى. (...) قاقتىعىس ايماعىندا ەرىكسىز جۇرگەن بالالاردى قايتارۋ جونىندەگى جۇمىستاردى جالعاستىرا بەرەمىز. (...)", - دەگەن ەدى پرەزيدەنت.
