«AMANAT» پارتياسىنىڭ مۇشەلەرى لاتيفۋنديستەردەن جەردى تاركىلەۋ پروتسەسىن باقىلاۋدا ۇستايدى. بۇل تۋرالى «AMANAT» پارتياسى جانىنداعى مەملەكەتتىك باسقارۋدى دامىتۋ جانە سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەستىڭ توراعاسى ەرلان سايروۆ مالىمدەدى.
ول قازىرگى ۋاقىتتا مەملەكەتكە بولات نازارباەۆتىڭ ەنشىلەس كومپانيالارىنا تيەسىلى ماڭعىستاۋ وبلىسىندا 239 مىڭ گەكتار، جامبىل وبلىسىندا 60 مىڭ گەكتار جەر مەملەكەتكە قايتارىلعانىن اتاپ ءوتتى. بۇعان دەيىن باس پروكۋراتۋرامەن بىرلەسىپ جۇرگىزىلگەن جۇمىس بارىسىندا بولات نازارباەۆقا تيەسىلى جالپى اۋماعى 244 گەكتار بولاتىن 59 جەر تەلىمى انىقتالعان ەدى.
«امانات» پارتياسىنىڭ قوعامدىق الاڭ رەتىندە ءاربىر ازاماتتىڭ ەنشىسى بولىپ تابىلاتىن ۇلتتىق بايلىقتى مەملەكەتكە قايتارۋ باستى ميسسياسى دەپ بىلەمىز! «بارماق باستى، كوز قىستىمەن» جىمقىرىلعان حالىق ىرىزدىعىن قايتارۋ جۇمىسىن جۇيەلى جۇرگىزەمىز. مارتەبەلى فاميلياعا، «بۇرىنعى ەڭبەگىڭىزگە»، قالتاڭىزدىڭ قالىڭدىعىنا قارامايمىز. حالىقتىڭ مەنشىگىنە قول سالدىڭىز با؟ قايتاراسىز. الماقتىڭ دا سالماعى بار جانە ول اۋىر»، - دەدى ەرلان سايروۆ.
سونداي-اق، جيىن بارىسىندا پارتيالىقتار استانا قالاسى بويىنشا سىبايلاس جەمقورلىققا قارسى ءىس-قيمىل جونىندەگى جۇمىستىڭ جاي-كۇيىن جانە پارتيانىڭ سايلاۋالدى ۋادەلەرىن جۇزەگە اسىرۋ جۇمىسىن قارادى.
كەڭەس مۇشەلەرى سوڭعى ءۇش جىلدا استانا قالاسىنداعى جەرگىلىكتى اتقارۋشى ورگاندارداعى سىبايلاس جەمقورلىققا قارسى ءىس-قيمىل جونىندەگى جۇمىستى تالدادى. كورسەتىلگەن كەزەڭدە سىبايلاس جەمقورلىققا قارسى قىزمەت 203 سىبايلاس جەمقورلىق قىلمىستى تىركەدى. ولاردىڭ نەگىزگى بولىگى پاراقورلىق – 147, ۇرلىق – 47 جانە لاۋازىمدىق وكىلەتتىكتەرىن اسىرا پايدالانۋدىڭ 9 فاكتىسى تىركەلدى.
كەڭەس توراعاسىنىڭ ورىنباسارى عالىم بايتوق اتاپ وتكەندەي، جەرگىلىكتى اتقارۋشى ورگانداردىڭ سىبايلاس جەمقورلىققا قارسى ءىس-قيمىل جۇمىسىندا فورماليزم ورىن الۋدا. اتاپ ايتقاندا، ەلوردا اكىمدىگى جانىنداعى سىبايلاس جەمقورلىققا قارسى ءىس-قيمىل جونىندەگى كوميسسيا 2021 جىلى 1 وتىرىس قانا وتكىزسە، ال 2020 جىلى بىردە-ءبىر جيىن بولماعان.
«ەلورداداعى جەرگىلىكتى اتقارۋشى ورگانداردىڭ جۇكتەلگەن مىندەتتى ورىنداۋ كەزىندەگى جاۋاپكەرشىلىگى تومەن ەكەنىن اتاپ ءوتۋ قاجەت. استانا قالاسى بويىنشا سىبايلاس جەمقورلىققا قارسى ءىس-قيمىل جانە مەملەكەتتىك باسقارۋدى دامىتۋ جونىندەگى ىستەردىڭ جاي-كۇيىن زەردەلەۋ بارىسىندا كەڭەستىڭ جۇمىس توبى سۇراتقان اقپاراتتى الماتى اۋدانىنىڭ اكىمدىگى جانە قۇرىلىس باسقارماسى مۇلدەم بەرمەگەن. سونداي-اق، ەلوردانىڭ اۋداندىق اكىمدىكتەرىنىڭ رەسمي سايتىن زەردەلەۋ كەزىندە ولاردىڭ قاجەتتى اقپاراتقا قول جەتكىزۋدى قامتاماسىز ەتپەگەنى انىقتالدى»، - دەدى عالىم بايتوق.
كەڭەس توراعاسىنىڭ ورىنباسارى جۇرتشىلىقتىڭ شاعىمىن تۋدىرىپ وتىرعان ەلورداداعى قۇرىلىس ماسەلەلەرىنە جەكە توقتالدى.
«ەلوردادا بەي-بەرەكەت قۇرىلىس جالعاسۋدا. مىسالى، Astana Mall سوو ماڭىنا 15-تەن استام تۇرعىن ءۇي كەشەنى سالىندى جانە بىردە-ءبىر مەكتەپ جوق. بۇل اكىمدىكتىڭ الەۋمەتتىك نىسانداردى: بالاباقشالاردى، مەكتەپتەردى، ەمحانالاردى سالۋ پروتسەسىن مۇلدەم قاداعالاماي، ۇيلەر سالۋعا رۇقسات بەرەتىندىگىن ايعاقتايدى. بۇل پروتسەسس مۇلدەم رەتتەلمەگەن، قاجەت جەرگە مەكتەپ سالىنباعان»، - دەپ اتاپ ءوتتى ول.
ايتا كەتۋ كەرەك، پارتيانىڭ «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسىن جۇزەگە اسىرۋ اياسىندا ەكى جىل ىشىندە استانادا 19 مەكتەپ، 2 دەنە شىنىقتىرۋ-ساۋىقتىرۋ كەشەنى، 21 مەديتسينا نىسانى، 400 مىڭ شارشى مەتردەن استام كوممەرتسيالىق ءۇي-جاي سالىندى. تەك 2022 جىلى 30 مىڭنان استام جۇمىس ورنى اشىلدى.
