شالقاردا ادام قولىنان مەرت بولعان ءجاسوسپىرىم ميراسبەك داۋلەتياردىڭ ءولىمى قالاداعى قىلمىستىق احۋال مەن وقۋشىلاردىڭ توپتاسىپ توبەلەسۋى سياقتى قوردالانعان ماسەلەلەرگە قوعام نازارىن قايتا اۋداردى.
قاڭتاردىڭ 28-ءى كۇنى تۋىستارى مەن سىنىپتاستارى اقتوبە وبلىسىنىڭ شالقار قالاسىنداعى مۇز ايدىنىندا "پىشاق جاراقاتىنان قازا تاپقان" ءجاسوسپىرىم ميراسبەك داۋلەتياردى اقتىق ساپارعا شىعارىپ سالدى. مارقۇمنىڭ وتباسى شالقار قالاسىنداعى بايسالباەۆ كوشەسىندە تۇرادى. بۇل ىقشاماۋداننىڭ ەل اراسىندا "ماياك" دەگەن بەيرەسمي اتاۋى بار. ميراسبەك وسى اۋدانداعى ءىدىرىس ۇرگەنىشباەۆ اتىنداعى مەكتەپكە بىلتىر اقتوبەدەگى وبلىستىق سپورت ينتەرناتىنان اۋىسىپ كەلگەن.
مەزگىلسىز ءولىم
ميراسبەك داۋلەتياردىڭ ولىمىنەن سوڭ شالقارداعى №6 مەكتەپتىڭ 10-سىنىپ وقۋشىسى قاماۋعا الىنعان. كۇدىكتى – ەل اراسىندا "رابوچي گورودوك" دەپ اتالاتىن ىقشاماۋداننىڭ تۇرعىنى. پوليتسيانىڭ مالىمەتىنە سايكەس، ءبىر-بىرىنە جالعاسىپ جاتقان ەكى اۋداننىڭ جوعارعى سىنىپ وقۋشىلارى قاڭتاردىڭ 26-سى كۇنى ساعات 18.00 شاماسىندا شالقار كولىنىڭ شەتىندەگى مۇز ايدىنىندا شەكىسىپ قالادى.
سول جەردە 10-سىنىپ وقۋشىسى ميراسبەك داۋلەتياردىڭ سول جاق كەۋدەسىنە پىشاق سۇعىلادى. دارىگەرلەردىڭ ايتۋىنشا، قانسىراپ جاتقان ءجاسوسپىرىمدى بەلگىسىز بىرەۋلەر اۋداندىق اۋرۋحانا جانىنا قالدىرىپ كەتكەن. قاقپا الدىندا ەس-ءتۇسسىز جاتقان ءجاسوسپىرىمدى كەزدەيسوق ادامدار اۋرۋحاناعا سۇيەپ كىرگىزگەن.
شالقار اۋداندىق اۋرۋحاناسى باس دارىگەرىنىڭ ەمدەۋ-پروفيلاكتيكالىق جۇمىستار جونىندەگى ورىنباسارى ەسەنعالي كوپەنوۆ ازاتتىققا:
- قاڭتاردىڭ 26-سى كۇنى ساعات 19.00 شاماسىندا وتە اۋىر جاعدايدا ءجاسوسپىرىم بالا جەتكىزىلدى. بىزگە تۇسكەندە جاعدايى وتە اۋىر بولدى. قان قىسىمى مۇلدەم بولمادى. سول جاق كەۋدەسىندە شانشىلىپ-تۇيرەلگەن جاراقات بايقالدى. شۇعىل تۇردە رەانيماتسيالىق شارالار جۇرگىزىلدى، سوعان قاراماستان ءجاسوسپىرىم بالا 15-20 مينۋت ارالىعىندا قايتىس بوپ كەتتى، - دەدى.
اۋرۋحانا توسەگىندە تىلگە كەلمەستەن ۇزىلگەن ميراسبەك داۋلەتيار ناۋرىز ايىندا 16 جاسقا تولار ەدى. وتباسىنداعى ءۇش ۇلدىڭ ورتانشىسى جۋىردا سپورت شەبەرلىگىن قورعاماق بوپ جۇرگەن. ميراسبەكتىڭ سىنىپ جەتەكشىسى الماس ىزباسقان وقۋشىسىنىڭ اۋداندىق جانە وبلىستىق دەڭگەيدەگى جارىستاردان جۇلدە الىپ جۇرگەن بوكسشى ەكەنىن ايتادى.
- ميراسبەك قاڭتاردىڭ 27-ءسى كۇنى اۋداندىق جارىسقا قاتىسۋى كەرەك بولاتىن. قاڭتاردىڭ 26-سى كۇنى كەشكىلىك قارالى حابار جەتتى. ول ەشقاشان جامان قىلىقتارىمەن كوزگە تۇسكەن ەمەس. تاربيەلى وتباسىنىڭ بالاسى ەدى، - دەيدى سىنىپ جەتەكشىسى.
قاڭتاردىڭ 28-ءى كۇنى ۇلىنىڭ جانازاسىنا قاتىسىپ، كوڭىل ايتا كەلگەندەرگە ميراسبەكتىڭ اناسى ايگۇل: "بالامدى ولتىرگەندەر ءادىل جازاسىن السىن!" دەپ داۋىس قىلا جىلاپ جاتتى.
شالقار اۋدانىنىڭ پروكۋرورى ارون ءابىلوۆتىڭ ايتۋىنشا، بۇل وقيعاعا بايلانىستى قىلمىستىق كودەكستىڭ "كىسى ءولتىرۋ" بابى بويىنشا ءىس قوزعالعان. كۇدىكتى ءجاسوسپىرىم قازىر اۋداندىق ىشكى ىستەر ءبولىمى جانىنداعى يزولياتوردا قاماۋدا وتىر.
توبەلەستىڭ ءتۇپ سەبەبى نە؟
ازاتتىق ءتىلشىسى بارعاندا كۇدىكتى وقىعان №6 مەكتەپتە جان-جاقتى تەكسەرۋ ءجۇرىپ جاتتى. ىشكى ىستەر ءبولىمى قىزمەتكەرلەرى مەكتەپ مۇعالىمدەرىنەن كۇدىكتى وقۋشى مەن كىسى ءولىمىن كوزىمەن كورگەن ءۇش كۋا تۋرالى مىنەزدەمە الىپ، اۋداندىق ءبىلىم ءبولىمى جانىنان قۇرىلعان جۇمىس توبى تاربيە جۇمىسىنىڭ قۇجاتتارىن تەكسەرە باستاعان.
- مۇز ايدىنىنداعى وقيعادان سوڭ كۇدىكتى رەتىندە №6 ورتا مەكتەبىنىڭ ءتورت وقۋشىسى ۇستالعان بولاتىن. كەيىن ونىڭ ۇشەۋى وقيعا كۋاگەرى رەتىندە بوساتىلدى. ولاردىڭ بارلىعى دا 10-سىنىپ وقۋشىلارى، - دەيدى №6 مەكتەپ ديرەكتورىنىڭ مىندەتىن اتقارۋشى ءاليا وسپانوۆا.
ۇزاق ۋاقىت اۋداندىق ءبىلىم بولىمىندە ادىسكەر بولعان ءاليا وسپانوۆا شالقار مەكتەپتەرىندەگى وقۋشىلاردىڭ اۋدان-اۋدانعا، ودان قالدى تۋعان جىلدارىنا قاراي توپ-توپقا ءبولىنىپ، شەكىسىپ قالاتىندارىن اڭعارىپتى.
شالقار – قاق ورتاسىن تەمىرجول ءبولىپ جاتقان شاعىن قالا. ميراسبەك داۋلەتيار قالانىڭ جەرگىلىكتى جۇرت "كول جاق" دەپ اتايتىن بولىگىندە پىشاقتالعان. بۇل اۋدان – تەمىرجولدىڭ وڭتۇستىك-باتىسىندا.
اتى-ءجونىن اتاماۋدى سۇراعان شالقارلىق وقۋشىنىڭ ازاتتىققا ايتۋىنشا، تەمىرجولدىڭ سولتۇستىك-شىعىس بولىگىندەگى ءۇش اۋدان "ماياك", "رابوچي گورودوك" پەن "ەرون" دەپ اتالادى. اتالمىش اۋدانداردىڭ جاستارى اراسىندا مۇنداي قاقتىعىستار بۇرىننان بار دەيدى تۇرعىندار. الايدا مۇنى رەسمي ورگاندار – اۋداندىق پروكۋراتۋرا مەن اۋداندىق ءبىلىم ءبولىمى جوققا شىعارادى.
- "شالقاردىڭ بالالارى اۋدان-اۋدانعا ءبولىنىپ توبەلەسەدى ەكەن، بۇرىننان بەرى توبەلەسىپ جۇرگەن، كەشەگى توبەلەس – سونىڭ جالعاسى ەكەن" دەگەن بەكەر اڭگىمە. ءبىز ىشكى ىستەر بولىمىمەن بايلانىسىپ وتىرمىز. ولار ءبىر كۇدىكتىنىڭ ۇستىنەن ءىس قوزعالعانىن، توپتاسا توبەلەسۋدىڭ بولماعانىن، قىلمىس الدىن الا ءسوز بايلاسۋ ارقىلى جاسالماعانىن ايتتى، - دەيدى اۋداندىق ءبىلىم ءبولىمىنىڭ باسشىسى ابزال ابدىكوۆ.
اقتوبە وبلىستىق ىشكى ىستەر دەپارتامەنتى بالا تاربيەسى ءۇشىن بىردەن-ءبىر جاۋاپتى تۇلعا "اتا-انا" دەپ سانايدى. دەپارتامەنت جاسوسپىرىمدەر اراسىنداعى قىلمىستى ءبىلىم بەرۋ مەكەمەلەرى، پوليتسيا مەن اتا-انانىڭ بىرلەسكەن ارەكەتى ارقىلى عانا ازايتۋعا بولادى دەپ مالىمدەپ كەلەدى.
شالقارداعى جاسوسپىرىمدەر قاقتىعىسى وبلىس ورتالىعى اقتوبەگە دە ءتان قۇبىلىس. جەرگىلىكتى پوليتسيا بيىل قاڭتاردىڭ 10-ى كۇنى اقتوبەدەگى ەسكى زيرات اۋماعىندا بولعان 40 شاقتى وقۋشىنىڭ توبەلەسىن ءالى دە تەكسەرىپ جاتقانىن حابارلادى. قالاداعى ءتورت مەكتەپتىڭ وقۋشىلارى توبەلەسىپ، جەرگىلىكتى ۋنيۆەرسيتەتتىڭ ءبىرىنشى كۋرس ستۋدەنتى جاراقات العان بۇل وقيعادان سوڭ قىلمىستىق كودەكستىڭ "بۇزاقىلىق" بابى بويىنشا ءىس قوزعالعان.
رەسمي اقپاراتقا سايكەس، 2018 جىلى اقتوبە وبلىسىندا جاسوسپىرىمدەر 146 رەت قىلمىس جاساعان. ونىڭ ەكەۋىندە جاسوسپىرىمدەر كىسى ولتىرگەن.
"ازاتتىق" راديوسى
