AMANAT پارتياسىنىڭ توراعاسى ەرلان قوشانوۆ ءماجىلىس سايلاۋى الدىندا مالىمدەمە جاساپ، بۇل سايلاۋ ساياسي-ەكونوميكالىق مونوپوليانىڭ تامىرىنا بالتا شاباتىنىن حابارلادى، دەپ جازادى “ادىرنا” ۇلتتىق پورتالى.
“ارداقتى اعايىن! كەشە پرەزيدەنتىمىز قاسىم-جومارت كەمەلۇلى توقاەۆ پارلامەنت ءماجىلىسى مەن ءماسليحات سايلاۋىنىڭ مەرزىمىن بەلگىلەدى. ءبىز مەملەكەت باسشىسىنىڭ مالىمدەمەسىن پارتيالاستارىمىزبەن مۇقيات تالقىلادىق. اتالعان شەشىم قوعام ءۇشىن دە، ەلدەگى ساياسي كۇشتەر ءۇشىن دە كۇتپەگەن جاعداي ەمەس. پرەزيدەنت وتكەن جىلدىڭ قىركۇيەك ايىندا سايلاۋ كۇنتىزبەسىن الدىن الا جاريا ەتكەن بولاتىن. بۇل ەلدەگى كونستيتۋتسيالىق رەفورمالاردىڭ زاڭدى جالعاسى، سوندىقتان دا AMANAT پارتياسى مەملەكەت باسشىسىنىڭ بۇل شەشىمىن تولىق قولدايتىنىن مالىمدەيدى. بۇل سايلاۋ ازاماتتاردىڭ ادىلدىككە دەگەن سەنىمىن بەكەمدەيدى. بۇل سايلاۋ ساياسي-ەكونوميكالىق مونوپوليانىڭ تامىرىنا بالتا شابادى. بۇل سايلاۋ جاڭا دەموكراتيالىق داستۇرلەر قالىپتاستىرۋعا مۇرىندىق بولادى. ەڭ باستىسى قوعامدا ءتۇرلى ساياسي كۇشتەرمەن سايلاۋشىلار دا وسى ساياسي ناۋقانمەن جۇگى مەن جاۋاپكەرشىلىگىن تولىق سەزىنۋى كەرەك.
سەبەبى مەملەكەتتىڭ تاۋەلسىزدىگى مەن تۇراقتى دامۋى ءۇشىن حالقىمىزدىڭ بەيبىت ءومىرى مەن باقۋاتتى تۇرمىسى ءۇشىن ءبارىمىز جاۋاپتىمىز. AMANAT پارتياسى الداعى سايلاۋعا تاس ءتۇيىن دايىن. پارتيا از ۋاقىتتىڭ ىشىندە تۇبەگەيلى ترانسفورماتسيادان ءوتتى. قاتارىمىزعا مىڭداعان جاڭا تولقىن جاستار قوسىلدى. پارتيانىڭ 4 مىڭ باستاۋىش ۇيىمى ميلليونعا جۋىق مۇشەسى ۇزدىكسىز تىنىمسىز جۇمىس ىستەۋدە. ولار وتكەن جىلعى جالپىحالىقتىق رەفەرەندۋمدا، پرەزيدەنت سايلاۋىندا زور بەلسەندىلىك تانىتتى. ۇلكەن ساياسي تاجىريبە جيناپ ابدەن شىڭدالدى. ەڭ باستىسى ءبىز جالاڭ ۇران، قۇرعاق ۋادە ەمەس، ناقتى ىستەرمەن اينالىستىق. وعان حالىق كۋا”،- دەدى ەرلان قوشانوۆ.
”ادىرنا” ۇلتتىق پورتالى
